Border News Agency
ဘာရိန်း၊မေ ၁၀။
ဘာရိန်းနိုင်ငံပြည်ထဲရေးဝန်ကြီးဌာနက အီရန်တော်လှန်ရေးအစောင့်တပ် (IRGC) နဲ့ ဆက်နွှယ်နေတယ်လို့ ယူဆရတဲ့ လူ ၄၁ ဦးကို ဖမ်းဆီးလိုက်တယ်လို့ မေလ ၈ ရက်နေ့ကထုတ်ပြန်ပါတယ်။
အဲဒီဖမ်းဆီးရမိသူတွေကို ဥပဒေကြောင်းအရ အရေးယူဖို့ လုပ်ဆောင်နေပြီလို့ ဘယ်လိုပုဒ်မတွေနဲ့ တရားစွဲထားလဲဆိုတာ အသေးစိတ်မပြောပေမယ့် သူတို့ဟာ အရင်ကဖြစ်ပွားခဲ့တဲ့ သူလျှိုလုပ်မှုတွေနဲ့ အီရန်ဘက်က တိုက်ခိုက်မှုတွေကို ထောက်ခံအားပေးမှုတွေနဲ့ ပတ်သက်နေတယ်လို့ ဆိုပါတယ်။
ပြီးခဲ့တဲ့ ဖေဖော်ဝါရီလနှောင်းပိုင်းကစခဲ့တဲ့ စစ်ပွဲအတွင်း အီရန်ရဲ့ လုပ်ရပ်တွေကို ထောက်ခံခဲ့ကြတာလို့ ယူဆရတယ်လို့ဆိုပါတယ်။
စစ်ပွဲအတွင်းမှာ အီရန်ဟာ ဘာရိန်းအပါအဝင် အိမ်နီးချင်းနိုင်ငံတွေကို ဒုံးကျည်တွေနဲ့ တိုက်ခိုက်ခဲ့လို့ အမေရိကန်စစ်စခန်းတွေ ပျက်စီးခဲ့ပါတယ်။
ဒါကြောင့်လည်း ဘာရိန်းအစိုးရက အီရန်ကို ထောက်ခံသူ ဒါမှမဟုတ် အီရန်ရဲ့ တိုက်ခိုက်မှုကို ချီးကျူးသူတွေကို ပြတ်ပြတ်သားသား အရေးယူမယ်လို့ သတိပေးထားတာပါ။
ဘာရိန်းဟာ ပြီးခဲ့တဲ့ မတ်လတုန်းကလည်း အီရန်အတွက် သူလျှိုလုပ်ပေးတယ်ဆိုတဲ့ စွပ်စွဲချက်နဲ့ လူအတော်များများကို ဖမ်းခဲ့ပါသေးတယ်။
အဲဒီအပြင်ဧပြီလကုန်မှာဆိုရင် အီရန်ဘက်တော်သားလို့ စွပ်စွဲခံရသူ ၆၉ ဦးကို နိုင်ငံသားအဖြစ်ကနေပါ ရပ်စဲခဲ့လို့ နိုင်ငံတကာ လူ့အခွင့်အရေးအဖွဲ့တွေက ဒါဟာ ဥပဒေချိုးဖောက်မှုဖြစ်တယ်လို့ ဝေဖန်နေကြပါတယ်။
အခုလို အီရန်နဲ့ ဆက်နွှယ်သူတွေကို လိုက်ဖမ်းနေတာဟာ ဘာရိန်းတင်မဟုတ်ဘဲ ယူအေအီးနိုင်ငံမှာလည်း ဧပြီလတုန်းက လူအတော်များများကို ဖမ်းဆီးခဲ့ပါတယ်။
အရှေ့အလယ်ပိုင်းမှာ စစ်ပွဲစတင်ကတည်းက ဒေသတွင်းနိုင်ငံတွေဟာ အီရန်နဲ့ ပတ်သက်တဲ့ အဖွဲ့အစည်းတွေကို အထူးစောင့်ကြည့် စစ်ဆေးနေကြတာ ဖြစ်ပါတယ်။
အမေရိကန်နဲ့ အီရန်ကြား ဧပြီ ၈ ရက်က သဘောတူထားတဲ့ အပစ်အခတ်ရပ်စဲရေးက တည်မြဲနေဆဲပါ။
ဒါပေမဲ့လည်း ဟော်မုဇ်ရေလက်ကြားမှာ ထိတွေ့တိုက်ခိုက်မှုတွေ ရှိနေသေးသလို၊သမ္မတထရမ့်ကလည်း အပေးအယူမရရင် အီရန်ကို အပြင်းအထန် ထပ်တိုက်ဖို့ အသင့်ပဲလို့ ပြောထားပါတယ်။
