Border News Agency
ကျောက်တော်၊မေ ၁၁။
ဘင်္ဂလားပင်လယ်အော်မှာ လေဖိအားနည်းရပ်ဝန်းကနေ ပိုမိုအားကောင်းတဲ့ မုန်တိုင်းငယ်အဖြစ် ပြောင်းလဲလာနိုင်တာကြောင့်အာရက္ခဒေသအပါအဝင် နေရာအနှံ့အပြားမှာ မိုးထစ်ချုန်းရွာပြီးဘေးအန္တရာယ်တွေ ဖြစ်ပေါ်လာနိုင်တယ်လို့ လူမှုရေးရာ၊အလုပ်သမားနဲ့ လူသားချင်းစာနာထောက်ထားရေးဝန်ကြီးဌာနက သတိပေးချက် ထုတ်ပြန်လိုက်ပါတယ်။
အာရက္ခဒေသမှာ နေရာကွက်ပြီး မိုးကြီးနိုင်တာအပြင် လေပြင်းတိုက်တာ၊ မိုးတိမ်တောင်တွေဖြစ်ပေါ်တာ၊လျှပ်စီးလက်တာနဲ့ မိုးကြိုးပစ်တာတွေ ဖြစ်နိုင်ပါတယ်။
ဒါ့အပြင် တောင်ကျချောင်းရေလျှံတာနဲ့ မြေပြိုတာတွေလည်း ဖြစ်ပေါ်လာနိုင်တာကြောင့် ဒေသခံတွေအနေနဲ့ အထူးသတိပြု နေထိုင်ကြဖို့ လိုအပ်နေပါတယ်။
အာရက္ခဒေသတွင်းရှိ စစ်ရှောင်စခန်းတွေ၊ တပ်ရင်းတပ်ဖွဲ့တွေနဲ့ နေအိမ်တွေမှာ မုန်တိုင်းဒဏ်ခံနိုင်ရည်ရှိအောင် အဆောက်အအုံတွေကို ကြိုတင်ပြုပြင်ထားကြဖို့ ဝန်ကြီးဌာနက တိုက်တွန်းထားပါတယ်။
လေပြင်းတိုက်ခတ်ချိန်မှာ အန္တရာယ်မဖြစ်စေဖို့ ခိုင်ခံ့မှုရှိအောင် အမြန်ဆုံး စီမံထားကြဖို့လည်း အကြံပြုထားတာပါ။
စိုက်ပျိုးရေးနဲ့ ပတ်သက်ပြီးတော့လည်း သီးနှံတွေနဲ့ ပျိုးပင်တွေ ရေကြီးနစ်မြုပ်တာမျိုး မဖြစ်အောင် ကြိုတင်ပြင်ဆင်ဖို့နဲ့ ရေစီးရေလာကောင်းအောင် ရေမြောင်းတွေ ရှင်းလင်းထားဖို့ လိုပါတယ်။
အာရက္ခဒေသက တောင်ကျချောင်းတွေဟာ မိုးများရင် အန္တရာယ်ရှိနိုင်တာကြောင့် သွားလာရာမှာလည်း သတိရှိကြဖို့ လိုအပ်ပါတယ်။
အခုဖြစ်ပေါ်မယ့် မိုးလေဝသအခြေအနေဟာ မေလ ၁၁ ရက်ကနေ ၁၇ ရက်နေ့အထိ ကြာမြင့်နိုင်တာကြောင့် အာရ္ခပြည်သူတွေအနေနဲ့ နောက်ဆုံးရ မိုးလေဝသသတင်းတွေကို စောင့်ကြည့်ပြီး ဘေးကင်းအောင် ကြိုတင်ပြင်ဆင်ထားကြဖို့လည်းအသိပေးပါတယ်။
