Border News Agency
မန္တလေး၊မေ ၁၁။
မန္တလေးမြို့ပေါ်နဲ့အနီးတဝိုက်က မြို့နယ် ၃ ခုမှာ စိတ်ကြွဆေးပြား ၂၁ သိန်းကျော်ကို ဖမ်းဆီးရမိခဲ့တယ်လို့ မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့ (CCDAC) က မေလ ၁၀ ရက်၊မနေ့ကထုတ်ပြန်ပါတယ်။
အဲဒီဖမ်းဆီးရမိတဲ့ ဆေးပြားတွေရဲ့ ကာလတန်ဖိုးဟာ ငွေကျပ် ၃ ဒသမ ၁၆ ဘီလီယံကျော် ရှိတယ်လို့ ဆိုပါတယ်။
အဲဒီဖမ်းဆီးမှုဟာ ဧပြီလ ၃၀ ရက်နေ့က ချမ်းမြသာစည်မြို့နယ်၊အောင်ပင်လယ်ရပ်ကွက်က တည်းခိုခန်းတခုမှာ စတင်ခဲ့တာပါ။
အဲဒီမှာ အမျိုးသမီးနှစ်ဦးကို ဆေးပြားအနည်းငယ်နဲ့ စတင်ဖမ်းမိခဲ့ပြီး သူတို့ရဲ့ ထွက်ဆိုချက်အရ ပုသိမ်ကြီးမြို့နယ်က အမျိုးသမီးတဦးကိုပါ ဆက်လက်ဖမ်းဆီးနိုင်ခဲ့တယ်လို့ဆိုပါတယ်။
အဲဒီကွင်းဆက်တွေကို ထပ်မံဖော်ထုတ်ရာမှာလည်း မေလ ၁ ရက်နေ့မှာ ပုသိမ်ကြီးမြို့နယ်၊ ရေတံခွန်တောင်ရပ်မှာ အမျိုးသမီးတဦးကို ဆေးပြား ၂၄,၀၀၀၊ကားတစီးနဲ့အတူ ဖမ်းမိခဲ့သလို ဆေးပြားတွေ ရောင်းခိုင်းသူ အောင်ရဲကျော် (ခ) မြင့်ကျော်ကိုပါ ဖမ်းဆီးရမိခဲ့တယ်လို့ ဆိုပါတယ်။
အဲဒီနောက်ချမ်းမြသာစည်နဲ့ စဉ့်ကိုင်မြို့နယ်တွေမှာ သူငှားထားတဲ့ အိမ်တွေကို ဝင်စစ်တဲ့အခါမှာ ဝှက်သိမ်းထားတဲ့ စိတ်ကြွဆေးပြား ၂၀ သိန်းကျော်ကို အသီးသီး ထပ်မံသိမ်းဆည်းရမိခဲ့တာလို့ဆိုပါတယ်။
အဲဒီဖမ်းဆီးရမိတဲ့ မူးယစ်ဆေးတွေကို ရှမ်းမြောက် ကွတ်ခိုင်မြို့က အားယုံ ဆိုသူက မန္တလေးမှာ ဖြန့်ဖို့ ပို့ထားတာလို့ ဆိုပါတယ်။
အဲဒီဖမ်းမိသူတွေကိုလည်း ဥပဒေအရ အရေးယူထားပြီး လွတ်မြောက်နေတဲ့ ကွင်းဆက်ပြစ်မှုကျူးလွန်သူတွေကို ဆက်လက်ဖော်ထုတ်နေတယ်လို့ ဆိုပါတယ်။
