Border News Agency
ပဲခူး၊မေ ၁၁။
ပဲခူးတိုင်း၊အုတ်ဖိုမြို့နယ်၊အေးမြသာယာမြို့သစ် အဝင်ဝမှာရှိတဲ့ ပျူစောထီးစခန်းကို မေလ၁၀ ရက်၊မနက်ပိုင်းမှာ ပြည်သူ့ကာကွယ်ရေးတပ်ဖွဲ့တွေက ဝင်ရောက်တိုက်ခိုက်ခဲ့တယ်လို့ ပဲခူးတိုင်းစစ်ဌာနက ထုတ်ပြန်ပါတယ်။
အဲဒီတိုက်ခိုက်မှုကို ပဲခူးတိုင်းစစ်ဌာန၊ ဗျူဟာ ၂၂ ကွပ်ကဲမှုအောက်က တပ်ဖွဲ့တွေက လုပ်ဆောင်ခဲ့တာဖြစ်ပြီး ပျူစောထီး ၂ ဦး သေဆုံးကာ ၆ ဦး ဒဏ်ရာရသွားတယ်လို့ဆိုပါတယ်။
အဲဒီအပြင် မေလ ၅ ရက်နေ့တုန်းကလည်း အုတ်ဖိုမြို့နယ်၊လွှစင်ကျေးရွာနားမှာ အာဏာသိမ်းစစ်တပ်ရဲ့ ကင်းပုန်းတပ်ဖွဲ့တွေနဲ့ ဗျူဟာ ၂၂ လက်အောက်ခံ အမှတ် ၃၈၀၁တပ်ရင်းတို့ ထိတွေ့တိုက်ပွဲ ဖြစ်ပွားခဲ့တယ်လို့ဆိုပါတယ်။
အဲဒီတိုက်ပွဲအတွင်းမှာအာဏာသိမ်းစစ်တပ်ဘက်က တပ်သား ၄ ဦး သေဆုံးခဲ့တယ်လို့လည်းဆိုပါတယ်။
အဲဒီအပြင် လက်ပံတန်းမြို့နယ်မှာလည်း ပြီးခဲ့တဲ့ မေလ ၉ ရက်နေ့က ကွမ်းခြံကျေးရွာမှာရှိတဲ့ အာဏာသိမ်းစစ်တပ်ရဲ့ အထိုင်ဂိတ်စခန်းကို တော်လှန်ရေးအင်အားစုတွေက ဝင်ရောက်တိုက်ခိုက်ခဲ့တယ်လို့ ဆိုပါတယ်။
အဲဒီစစ်ဆင်ရေးကို ပဲခူးတိုင်းစစ်ဌာနနဲ့ သာယာဝတီခရိုင် ပကဖ တပ်ဖွဲ့တွေ ပူးပေါင်းပြီး လုပ်ဆောင်ခဲ့တာလို့ဆိုပါတယ်။
အဲဒီလိုပဲခူးတိုင်းအတွင်းက နေရာအသီးသီးမှာ ဖြစ်ပွားခဲ့တဲ့ တိုက်ခိုက်မှုတွေအတွင်း တော်လှန်ရေးတပ်ဖွဲ့ဝင်တွေဘက်က အထိအခိုက်မရှိဘဲ အောင်မြင်စွာ ဆုတ်ခွာနိုင်ခဲ့တယ်လို့ ဆိုပါတယ်။
အခုနောက်ပိုင်း ပဲခူးတိုင်းထဲမှာ အာဏာသိမ်းစစ်တပ်တွေနဲ့ ဒေသခံကာကွယ်ရေးတပ်ဖွဲ့တွေကြား တိုက်ပွဲတွေ ခပ်စိပ်စိပ် ဖြစ်ပွားလာနေတာပါ။
နယ်မြေစိုးမိုးရေးအတွက် နှစ်ဖက်စလုံးက အရှိန်မြှင့်နေကြတာကြောင့် ဒေသခံပြည်သူတွေအနေနဲ့လည်း စစ်ရေးသတိရှိကြဖို့ တော်လှန်ရေးအဖွဲ့တွေက တိုက်တွန်းထားပါတယ်။
