Border News Agency
မန္တလေး၊ မေ ၁၁။
မန္တလေးတိုင်းအတွင်းရှိမြို့နယ်တွေမှာ အာဏာသိမ်းစစ်တပ်ကြောင့် ဧပြီလအတွင်း ၇၂ ဦးသေဆုံးသွားခဲ့တယ်လို့ Emergency Management Committee – MDY (EMC-Mandalay) အဖွဲ့က မေလ၁၀ ရက်၊ မနေ့ကထုတ်ပြန်ပါတယ်။
အဲဒီ မြင်းခြံ ၊ငါန်းဇွန်၊ တောင်သာနဲ့ နွားထိုးကြီးမြို့နယ်တွေမှာ အာဏာသိမ်းစစ်တပ်ရဲ့ လေကြောင်း၊ လက်နက်ကြီးနဲ့ စစ်ကြောင်းထိုးတာတွေကြောင့် အရပ်သားတွေသေဆုံးခဲ့ပြီး ဒဏ်ရာရတာတွေရှိခဲ့ပါတယ်။
EMC-Mandalayအနေနဲ့ မြေပြင်မှကောက်ယူရရှိထားတဲ့စာရင်းတွေအရ မြင်းခြံမြို့နယ်က ၃၀ ဦး၊ ငါန်းဇွန်မြို့နယ်က ၂၃ ဦး၊ တောင်သာမြို့နယ်က ၁၂ ဦးနဲ့ နွားထိုးကြီးမြို့နယ်တွင် ၇ ဦးတို့ ဖြစ်ပါတယ်။
အဲဒီသေဆုံးခဲ့ရတဲ့အထဲမှာ ကာကွယ်စောင့်ရှောက်မှု အထူးလိုအပ်တဲ့ အမျိုးသမီးတွေ၊ ကလေးငယ်တွေနဲ့ သက်ကြီးရွယ်အိုတွေအများအပြားပါဝင်နေပါတယ်။
EMC-Mandalayအနေနဲ့ သေဆုံးဒဏ်ရာရမိသားစုဝင်တွေအတွက် ပြည်တွင်း၊ ပြည်ပအလှူရှင်တွေရဲ့ ပံ့ပိုးကူညီမှုတွေနဲ့လိုအပ်တဲ့ ငွေသားထောက်ပံ့မှုတွေကို ချိတ်ဆက်ဆောင်ရွက်ပေးနေတယ်လို့ ဆိုပါတယ်။
မြေပြင်မှာ အမှန်တကယ်အကူအညီလိုအပ်နေသူတွေရှိနေသေးတာကြောင့် ပံ့ပိုးတာတွေဆက်လက်လုပ်ဆောင်နိုင်ဖို့အတွက်ပြည်သူတွေအနေနဲ့ တတ်နိုင်သမျှပါဝင်လှူဒါန်းဖို့ တိုက်တွန်းထားပါတယ်။
