Border News Agency
ထိုင်း၊မေ ၁၁။
ထိုင်းဝန်ကြီးချုပ်ဟောင်း သက်ဆင် ရှင်နာဝပ်ထရာဟာ အဂတိမှုနဲ့ ကျခံနေရတဲ့ ထောင်ဒဏ်တနှစ်ထဲက ရှစ်လပြည့်ပြီးတဲ့နောက် မေလ ၁၁ ရက်၊ဒီနေ့မနက်က ခံဝန်နဲ့ ထောင်ကနေ လွတ်လာပြီလို့သိရပါတယ်။
အဲဒီဘန်ကောက်က Klong Prem အကျဉ်းထောင်ကနေဒီနေ့မနက် ၇ နာရီခွဲကျော်မှာထွက်လာတဲ့ သက်ဆင်ကို သမီးဖြစ်သူ ပေတုံတန်နဲ့ ထောက်ခံသူ ရာနဲ့ချီတဲ့လူတွေက အနီရောင်တွေဝတ်ပြီး သွားရောက်ကြိုဆိုခဲ့ကြပါတယ်။
အသက် ၇၆ နှစ်အရွယ်ရှိပြီဖြစ်တဲ့ သက်ဆင်ဟာ လာမယ့် ၄ လတာ ခံဝန်ကာလအတွင်းမှာ ခြေရာခံစောင့်ကြည့်တဲ့ လျှပ်စစ်ခြေကျင်းဝတ်ဝတ်ဆင်ထားရမှာပါ။
သူဟာ ၂၀၂၃ ခုနှစ်မှာ ထိုင်းနိုင်ငံကို ပြန်ရောက်လာပြီးနောက် ထောင်ဒဏ် ၈ နှစ် ချမှတ်ခံခဲ့ရပေမယ့် ဘုရင်မင်းမြတ်ရဲ့ လွတ်ငြိမ်းချမ်းသာခွင့်နဲ့ ထောင်ဒဏ် ၁ နှစ်အထိ လျှော့ပေါ့ပေးတာ ခံခဲ့ရသူ ဖြစ်ပါတယ်။
သက်ဆင်ဟာ ထောင်ကျနေတုန်းက ကျန်းမာရေးအကြောင်းပြချက်နဲ့ ဆေးရုံမှာပဲ အချိန်အတော်ကြာ နေထိုင်ခဲ့တာကြောင့် ဝေဖန်မှုတွေ အများကြီးရှိခဲ့ပါတယ်။
ဒါပေမယ့် ပြီးခဲ့တဲ့နှစ် စက်တင်ဘာလမှာတော့ တရားရုံးချုပ်က သက်ဆင်ရဲ့ ကျန်းမာရေးဟာ စိုးရိမ်ရတဲ့အခြေအနေ မဟုတ်ဘူးလို့ ဆုံးဖြတ်ခဲ့တာကြောင့် ကျန်ရှိတဲ့ပြစ်ဒဏ်ကို အကျဉ်းထောင်ထဲမှာပဲ ဆက်ပြီးကျခံခဲ့ရတာပါ။
အဲဒီ ထိုင်းအစိုးရအဖွဲ့ထဲမှာ သက်ဆင်ရဲ့ ဖြူထိုင်းပါတီက ညွန့်ပေါင်းအဖွဲ့ဝင်အဖြစ် ပါဝင်နေတာကြောင့် သက်ဆင် လွတ်မြောက်လာတာဟာ ပါတီအတွက် အားတခု ဖြစ်လာနိုင်ပါတယ်။
ဒါပေမယ့် ပြီးခဲ့တဲ့ ဖေဖော်ဝါရီလ ရွေးကောက်ပွဲမှာ ဖြူထိုင်းပါတီဟာ တတိယနေရာအထိ ကျဆင်းသွားခဲ့တာကြောင့် သက်ဆင်အနေနဲ့ နိုင်ငံရေးလောကထဲကို ဘယ်လောက်အထိ ပြန်ပြီးလွှမ်းမိုးနိုင်မလဲဆိုတာကတော့ စိတ်ဝင်စားစရာပဲ ဖြစ်ပါတယ်။
နိုင်ငံရေးလေ့လာသူတွေကတော့ သက်ဆင်လွတ်မြောက်လာတာကို ရှေးရိုးစွဲဝါဒီတွေက မျက်ခြေမပြတ် စောင့်ကြည့်နေကြလိမ့်မယ်လို့ သုံးသပ်နေကြပါတယ်။
တဖက်မှာလည်း သူ့ကို ထောက်ခံသူတွေကတော့ သက်ဆင်ဟာ ပြည်သူတွေရဲ့ စားဝတ်နေရေးအတွက် လုပ်ဆောင်ပေးခဲ့သူဖြစ်လို့ နိုင်ငံရေးကနေ နုတ်ထွက်သွားမှာ မဟုတ်ဘူးလို့ ယုံကြည်နေကြပါတယ်။
