Border News Agency
နေပြည်တော်၊ မေ ၁၉။
နိုင်ငံတကာဒဏ်ခတ်ပိတ်ဆို့မှုတွေရှိနေပေမယ့် ဇိမ်ခံရွက်လှေထုတ်လုပ်ရေးလုပ်ငန်းတွေမှာ မြန်မာ့ကျွန်းသစ်တရားမဝင်မှောင်ခိုကုန်သွယ်မှုဆက်ရှိနေတာမို့ ထိရောက်စွာဆက်အရေးယူဖို့ Justice For Myanmar (JFM) တောင်းဆိုလိုက်ပါတယ်။
အမေရိကန်သို့တင်သွင်းတဲ့ရွက်လှေတွေမှာ မြန်မာ့ကျွန်းသစ် တရားမဝင်အသုံးပြုခဲ့မှုအတွက် ဗြိတိန်အခြေစိုက် Sunseeker အပါအဝင် ဇိမ်ခံရွက်လှေထုတ်လုပ်ရေးကုမ္ပဏီကြီးတွေက အပြစ်ရှိကြောင်းဝန်ခံခဲ့ပြီး ဒဏ်ငွေအမေရိကန်ဒေါ်လာနှစ်သိန်းပေးဆောင်ဖို့ အမေရိကန်တရားရေးဝန်ကြီးဌာနအမိန့်ချခဲ့ပါတယ်။
အဲဒီကုမ္ပဏီဟာ ၂၀၂၃ ခုနှစ်ကလည်း ယူကေမှာ သစ်တောထွက်ကုန် ဥပဒေချိုးဖောက်မှုကြောင့် ဒဏ်ငွေဒေါ်လာလေးသိန်းငါးသောင်းခန့် ပေးဆောင်ခဲ့ရပါတယ်။
အဲဒီအပြင် နယ်သာလန်အခြေစိုက် Oceanco ရွက်လှေထုတ်လုပ်ရေး ကုမ္ပဏီဟာလည်း တူရကီကတဆင့် မြန်မာ့ကျွန်းသစ်တွေကို ခိုးယူတင်သွင်းပြီးအမေဇုံတည်ထောင်သူ ဘီလျံနာ Jeff Bezos ရဲ့ ဇိမ်ခံရွက်လှေမှာ အသုံးပြုခဲ့တာကြောင့် ဥရောပသမဂ္ဂ (EU) သစ်လုပ်ငန်းဆိုင်ရာပြဋ္ဌာန်းချက်တွေအတိုင်း ဒဏ်ရိုက်အရေးယူခံခဲ့ရပါတယ်။
မြန်မာနိုင်ငံမှာ စစ်တပ်ကအာဏာသိမ်းဖို့ ကြိုးပမ်းပြီးနောက်ပိုင်း အမေရိကန်နဲ့ နိုင်ငံတကာအစိုးရတွေက အာဏာသိမ်းစစ်တပ်ရဲ့ အဓိကဝင်ငွေရလမ်းဖြစ်တဲ့ မြန်မာ့သစ်လုပ်ငန်းအပေါ်ပိတ်ဆို့မှုတွေ ချမှတ်ခဲ့တာ ဖြစ်ပါတယ်။
ဒါပေမယ့်ကုမ္ပဏီတချို့ဟာ ဥပဒေကိုရှောင်လွှဲပြီး သစ်ကုန်သွယ်မှုဆက်လုပ်နေတာကြောင့် ပို့ကုန်ဝင်ငွေတွေဟာ တရားမဝင်အာဏာသိမ်းစစ်တပ်ဆီ ဆက်လက်စီးဆင်းနေပြီး အရပ်သားပြည်သူတွေအပေါ် ရက်စက်ကြမ်းကြုတ်တဲ့ ရာဇဝတ်မှုတွေကျူးလွန်ဖို့ ငွေကြေးထောက်ပံ့သလို ဖြစ်နေတယ်လို့ JFM က ထောက်ပြပါတယ်။
အဲဒါကြောင့် အမေရိကန်၊ အီးယူနဲ့ ယူကေအစိုးရတွေအနေနဲ့ အာဏာသိမ်းစစ်တပ်ရဲ့ အကြမ်းဖက်စစ်ဆင်ရေးတွေကို ရပ်တန့်နိုင်ဖို့အတွက် မြန်မာ့သစ်မှောင်ခိုကုန်သွယ်မှုတွေကို အရေးတကြီးစုံစမ်းစစ်ဆေးဖို့၊ ငွေပေးချေမှုမှာပါဝင်တဲ့ ဘဏ်တွေကို စစ်ဆေးဖို့နဲ့ သူတို့ထိန်းချုပ်ထားတဲ့ ကဏ္ဍတွေအပေါ် ပစ်မှတ်ထားတဲ့ ပိတ်ဆို့မှုအသစ်တွေ ထပ်မံချမှတ်ကာ မြန်မာ့သစ်တင်သွင်းမှုကို လုံးဝပိတ်ပင်တားမြစ်ပေးဖို့ တောင်းဆိုထားပါတယ်။
