Border News Agency
ဘင်္ဂလားဒေ့ရှ်၊မေ ၂၃။
ဘင်္ဂလားဒေ့ရှ်နိုင်ငံ၊ကော့ဘဇားမှာ ဘင်္ဂလားဒေ့ရှ်တာကာ ၇၈ သိန်းတန်ဖိုးရှိတဲ့ စိတ်ကြွရူးသွပ်ဆေးပြား၁၅,၆၀၀ ပြားနဲ့အတူ မူးယစ်ဆေးဝါးမှောင်ခိုကူးသူ ၂ ဦးကို ဘင်္ဂလားဒေ့ရှ် ကမ်းခြေစောင့်တပ်ဖွဲ့က ဖမ်းဆီးလိုက်ပါတယ်။
အဲဒီကမ်းခြေစောင့်တပ်ဖွဲ့ဟာ သတင်းအရ ကော့ဘဇားဒေသတွင်းမှာ မူးယစ်ဆေးဝါးတားဆီးနှိမ်နင်းရေး စစ်ဆင်ရေးတခု ပြုလုပ်ခဲ့ရာကနေ အခုလို သက်သေခံဆေးပြားတွေနဲ့အတူ ပြစ်မှုကျူးလွန်သူတွေကို လက်ရဖမ်းဆီးရမိခဲ့တာ ဖြစ်ပါတယ်။
အဲဒီကော့ဘဇား ဆဒါးရဲစခန်းနယ်မြေထဲမှာရှိတဲ့ သုဂန္ဓာကမ်းခြေ အနီးမှာ မေလ ၂၂ ရက်၊မနက်အစောပိုင်းကဖမ်းဆီးခဲ့တာလို့ဆိုပါတယ်။
အဲဒီဖမ်းဆီးရမိတဲ့ ဆေးပြားတွေနဲ့အတူ မှောင်ခိုကူးရာမှာအသုံးပြုတဲ့ ကိုယ်ပိုင်ကားတစီးကိုပါသိမ်းဆည်းရမိခဲ့ပြီး လူငယ်ထုကို မူးယစ်ဆေးဝါးအန္တရာယ်ကနေ ကာကွယ်ဖို့အတွက် နောက်နောင်မှာလည်း ဒီလိုနှိမ်နင်းရေးစစ်ဆင်ရေးတွေကို ဆက်တိုက်လုပ်ဆောင်သွားမယ်လို့ ကမ်းခြေစောင့်တပ်ဖွဲ့က ဆိုပါတယ်။
ဖမ်းဆီးရမိတဲ့ မူးယစ်ဆေးဝါးမှောင်ခိုသမား ၂ ဦးကို သက်ဆိုင်ရာ ရဲစခန်းဆီ လွှဲပြောင်းပြီး ဥပဒေအရ ထိရောက်စွာ အရေးယူနိုင်ဖို့ ဆောင်ရွက်နေတယ်လို့လည်းဆိုပါတယ်။
