Border News Agency
စစ်ကိုင်း၊မေ ၂၃။
စစ်ကိုင်းတိုင်း၊ဒီပဲယင်းမြို့နယ်မှာ ယာယီပိတ်ထားခဲ့တဲ့ စတားလင့်အင်တာနက်ဝန်ဆောင်မှုတွေကို သတ်မှတ်ကန့်သတ်ချက်တွေနဲ့အတူ ပြန်လည်ခွင့်ပြုလိုက်တယ်လို့ မြို့နယ်ပြည်သူ့အုပ်ချုပ်ရေးအဖွဲ့က မေလ ၂၂ ရက်၊မနေ့ကထုတ်ပြန်ပါတယ်။
သတင်းလုံခြုံရေးအရ စတားလင့်အသုံးပြုသူတွေနဲ့လုပ်ငန်းရှင်တွေအနေနဲ့ စည်းကမ်းချက်တွေကို မဖြစ်မနေ လိုက်နာရမှာ ဖြစ်ပါတယ်။
အဲဒီ မိမိတို့ ကျေးရွာ၊ရပ်ကွက်ထဲက ဒေသခံတွေကိုပဲဘောက်ချာကတ် ရောင်းချပေးရမှာဖြစ်ပြီး ခရီးသွားတွေကို လုံးဝ ရောင်းချတာမလုပ်ဘူးလို့ဆိုပါတယ်။
အဲဒီအပြင်စစ်ရှောင်တွေအတွက် ဘောက်ချာကတ်ရောင်းပေးဖို့ လိုအပ်လာရင် စစ်ရှောင်တွေကိုလက်ခံထားတဲ့ အိမ်ရှင်သို့မဟုတ်ရပ်ရွာတာဝန်ရှိသူတဆင့်ပဲ ရောင်းချပေးရမှာ ဖြစ်ပါတယ်။
ဘောက်ချာကတ် ရောင်းချမှုစာရင်းတွေကို နေ့ရက်အလိုက် မှတ်တမ်းထားရှိရမှာ ဖြစ်ပါတယ်။
အင်တာနက် အသုံးပြုသူတွေအနေနဲ့ စစ်ရှောင်နေရာတွေ၊ စစ်ရေးသတင်းတွေနဲ့ လုံခြုံရေးဆိုင်ရာ အချက်အလက်တွေကို အွန်လိုင်းပေါ် ရေးသားခြင်း မပြုဖို့ ကန့်သတ်ထားပါတယ်။
အဲဒီကန့်သတ်ချက်တွေကို လိုက်နာတာမရှိတဲ့ စတားလင့်လုပ်ငန်းရှင်တွေကို တွေ့ရရင် စက်ပစ္စည်းသိမ်းဆည်းတာအပါအဝင် အခြားအရေးယူမှုတွေပါ ပြုလုပ်သွားမယ်လို့ အသိပေးထားပါတယ်။
