Border News Agency
အမေရိကန်၊မေ ၂၃။
အမေရိကန်ကြားဝင်စေ့စပ်ပေးထားတဲ့ အပစ်အခတ်ရပ်စဲရေးသဘောတူညီချက် ရှိနေပေမယ့်လက်ဘနွန်တောင်ပိုင်းမှာ အစ္စရေးရဲ့ တိုက်ခိုက်မှုတွေကြောင့်မေလ ၂၂ ရက်နေ့မှာတင်ကျန်းမာရေးဝန်ထမ်းတွေအပါအဝင် အနည်းဆုံး ၁၁ ဦး သေဆုံးသွားပါတယ်။
တိုင်ယာခရိုင်အတွင်းက နေရာအချို့ကို အစ္စရေးက လေကြောင်းကနေတိုက်ခိုက်ခဲ့တာဖြစ်ပြီး ဒိုင်ရ်ကာနွန်အန်နာမြို့နယ်မှာ အရေးပေါ်ကျန်းမာရေးဝန်ထမ်း ၂ ဦးနဲ့ ကလေးငယ် ၁ ဦးအပါအဝင် ၆ ဦး သေဆုံးခဲ့သလို၊ ဟာနောင်ဝီယာမြို့မှာလည်း ကျန်းမာရေးဝန်ထမ်း ၄ ဦး သေဆုံးခဲ့ပါတယ်။
ဒါ့အပြင် နာဘာတီးယားမြို့မှာလည်း အမျိုးသား ၁ဦး သေဆုံးခဲ့ပါတယ်။
အပစ်ရပ်သဘောတူညီချက်ကို လက်ဘနွန်အစိုးရနဲ့ လက်ခံထားပေမယ့် အပစ်ရပ်စဲရေးကို ဆန့်ကျင်နေတဲ့ ဟစ်ဇဘိုလာလက်နက်ကိုင်အဖွဲ့ကို ဆက်လက်ပစ်မှတ်ထားသွားမယ်လို့ အစ္စရေးဘက်က ပြောဆိုထားပါတယ်။
ပြီးခဲ့တဲ့ ဧပြီလလယ်ကစပြီး အပစ်ရပ်သဘောတူညီချက် စတင်သက်ရောက်ခဲ့ပေမယ့်လက်ရှိအချိန်အထိအစ္စရေးရဲ့ တိုက်ခိုက်မှုတွေကြောင့် လူပေါင်း ၄၀၀ ကျော် သေဆုံးခဲ့ပြီးပါပြီ။
အစ္စရေးက ဟစ်ဇဘိုလာအဖွဲ့ဟာ ဆေးရုံတွေနဲ့ လူနာတင်ယာဉ်တွေကို အကာအကွယ်ယူပြီး လက်နက်တွေ၊ တိုက်ခိုက်ရေးသမားတွေကို ဝှက်ထားတယ်လို့ စွပ်စွဲထားပေမယ့် လက်ဘနွန်အစိုးရကတော့ ဒါကို ငြင်းဆိုထားပါတယ်။
လက်ဘနွန်ကျန်းမာရေးဝန်ကြီးဌာနရဲ့ ထုတ်ပြန်ချက်အရ ပြီးခဲ့တဲ့ မတ်လဆန်းကစတင်ခဲ့တဲ့ စစ်ရေးပဋိပက္ခအတွင်းမှာ ကျန်းမာရေးဝန်ထမ်း ၁၁၆ ဦး သေဆုံးခဲ့ပြီး ဆေးရုံ ၁၆ လုံး ပျက်စီးကာ လူနာတင်ယာဉ် ၁၄၇ စီး တိုက်ခိုက်ခံခဲ့ရတယ်လို့ သိရပါတယ်။
ပြီးခဲ့တဲ့မတ်လကစတင်ခဲ့တဲ့ အစ္စရေး-ဟစ်ဇဘိုလာ စစ်ပွဲအတွင်း လက်ဘနွန်မှာ သေဆုံးသူ စုစုပေါင်း ၂,၈၉၆ ဦး ရှိလာခဲ့ပြီဖြစ်ပြီး လူဦးရေ ၁ ဒသမ ၆ သန်းကျော် (နိုင်ငံလူဦးရေရဲ့ ၅ ပုံ ၁ ပုံခန့်) အိုးအိမ်စွန့်ခွာ ထွက်ပြေးနေကြရပါတယ်။
အမေရိကန်ရဲ့ ကြားဝင်မှုကြောင့် ပြီးခဲ့တဲ့ အပတ်က အပစ်ရပ်သက်တမ်းကို ၄၅ ရက် ထပ်တိုးခဲ့ပေမယ့် နှစ်ဖက်အပြန်အလှန် ပစ်ခတ်တိုက်ခိုက်မှုတွေကတော့ ဆက်ရှိနေဆဲ ဖြစ်ပါတယ်။
