Border News Agency
စစ်ကိုင်း၊မေ ၂၃။
စစ်ကိုင်းတိုင်း၊ရွှေဘိုခရိုင်အတွင်းမှာ Operation OTT စစ်ဆင်ရေးကာလအတွင်း သတင်းလုံခြုံရေးနဲ့ပြည်သူလူထုရဲ့ အသက်အိုးအိမ်လုံခြုံရေးအတွက် ယာယီပိတ်သိမ်းထားခဲ့တဲ့ စတားလင့်ခ်အင်တာနက်တွေကို ပြန်လည်ဖွင့်လှစ်ပေးလိုက်ပြီလို့ သိရပါတယ်။
ခုရှိအချိန်မှာ အဲဒီစစ်ဆင်ရေး ပြီးဆုံးသွားပြီဖြစ်တာကြောင့် အများပြည်သူသုံး စတားလင့်အင်တာနက်တွေကို ပြန်လည်အသုံးပြုနိုင်ပြီလို့ အမှတ် ၁ ရွှေဘိုခရိုင်စစ်ဒေသခွဲက မေလ ၂၂ ရက်နေ့မှာထုတ်ပြန်ပါတယ်။
စစ်ဆင်ရေးကာလအတွင်း ရန်သူ့ကျည်ဆန်၊ ဗုံးဆန်တွေကြားထဲကနေ ရဲရဲဝံ့ဝံ့တိုက်ပွဲဝင်ခဲ့ကြတဲ့ ရဲဘော်တွေနဲ့အတူ တသွေးတည်းတသားတည်း ရပ်တည်ပေးခဲ့ကြတဲ့ တော်လှန်ရေးအဖွဲ့အစည်းတွေကို ကျေးဇူးတင်တယ်လို့ ဆိုပါတယ်။
ဒါ့အပြင် စစ်သတင်းလုံခြုံရေးစည်းကမ်းတွေကို တိတိကျကျလိုက်နာပြီး ပူးပေါင်းပါဝင်ပေးခဲ့ကြတဲ့ တော်လှန်ပြည်သူတရပ်လုံးကိုလည်း အမှတ် ၁ရွှေဘိုခရိုင်စစ်ဒေသခွဲအနေနဲ့ လေးစားဦးညွှတ် ကျေးဇူးတင်ရှိတယ်လို့လည်းဆိုပါတယ်။
နောင်ခရီးစဉ်တွေမှာလည်း တော်လှန်ရေးအောင်ပွဲကို ပြည်သူလူထုနဲ့အတူတကွ ဆင်နွှဲနိုင်ဖို့အတွက် ရှေ့ဆက်လုပ်ဆောင်ရမယ့် အားသာချက်၊ အားနည်းချက်တွေကို ပြင်ဆင်ပြီး လုပ်သင့်လုပ်ထိုက်တာတွေကို တစိုက်မတ်မတ် ဆက်လက်လုပ်ဆောင်သွားမယ်လို့ အသိပေးထားပါတယ်။
