Border News Agency
ထိုင်း၊ မေ ၂၀။
ထိုင်းနိုင်ငံဟာ နိုင်ငံပေါင်း ၉၀ ကျော်ကခရီးသွားတွေအတွက် ရက်ပေါင်း ၆၀ ဗီဇာမလိုဘဲ နေထိုင်ခွင့်ပြုထားတဲ့အစီအစဉ်ကို ဖျက်သိမ်းဖို့ အစိုးရအဖွဲ့က မေလ ၁၉ ရက်နေ့က အတည်ပြုလိုက်ပါတယ်။
အရင်ကလိုရက်ပေါင်း ၃၀ ဝန်းကျင်ပဲ နေထိုင်ခွင့်ပြုမယ့်မူဝါဒဟောင်းကို ပြန်သုံးတော့မှာဖြစ်တယ်လို့ ခရီးသွားလာရေးနဲ့ အားကစားဝန်ကြီး ဆူရာဆတ်ဖန်ချာရွန်ဝိုရာကူးလ်က ပြောပါတယ်။
အစိုးရအဖွဲ့ရဲ့ ဆုံးဖြတ်ချက်ကို လုပ်ငန်းစဉ်တွေမစခင် သက်ဆိုင်ရာဌာနတွေကို အကြောင်းကြားသွားမှာပါ။
ဗီဇာမူဝါဒကော်မတီအနေနဲ့ နိုင်ငံတစ်နိုင်ငံချင်းစီအလိုက် ဗီဇာစည်းမျဉ်းတွေကိုပြန်သုံးသပ်မှာဖြစ်ပြီး လုံခြုံရေးနဲ့ စီးပွားရေးအခြေအနေတွေကို ထည့်သွင်းစဉ်းစားပြီးမှ နိုင်ငံအလိုက် သင့်တော်မယ့်ဗီဇာအမျိုးအစားကို သတ်မှတ်ပေးသွားမယ်လို့ ဆိုပါတယ်။
ဒါကြောင့် အရင်ကရက်ပေါင်း ၆၀ ဗီဇာကင်းလွတ်ခွင့်ရထားတဲ့ နိုင်ငံတွေဟာ မူလဗီဇာစည်းကမ်းချက်တွေအတိုင်း ပြန်ဖြစ်သွားမှာဖြစ်ပြီး ခရီးသွားအများစုအနေနဲ့ ထိုင်းနိုင်ငံမှာ ရက်ပေါင်း ၃၀ ခန့်သာ နေထိုင်ခွင့်ရတော့မှာ ဖြစ်ပါတယ်။
