Border News Agency
နေပြည်တော်၊ မေ ၂၀။
အာဏာသိမ်းစစ်တပ်က လွတ်ငြိမ်းချမ်းသာခွင့်နဲ့ ပြန်လည်လွတ်မြောက်လာသူတွေ၊ သူတို့ရဲ့ မိသားစုဝင်တွေနဲ့ မိတ်ဆွေတွေအပါအဝင် လူပုဂ္ဂိုလ် ၅ သောင်းဝန်းကျင်ရဲ့ ကိုယ်ရေးအချက်အလက်တွေကို နည်းပညာအသုံးပြုပြီး စဉ်ဆက်မပြတ်စောင့်ကြည့်နေတယ်လို့ အသံအဖွဲ့ကထုတ်ပြန်ပါတယ်။
အာဏာသိမ်းစစ်တပ်ဟာ လူပုဂ္ဂိုလ်တွေကို စိစစ်ကြပ်မတ်တာနဲ့ စောင့်ကြည့်ထောက်လှမ်းရေးစနစ် (PSMS) ကို အသုံးပြုပြီး အနီးကပ်နောက်ယောင်ခံ စောင့်ကြည့်နေတာပါ။
Spring Revolution Database (SRD) ရဲ့ ထုတ်ပြန်ချက်အရ လက်ရှိမှာစစ်တပ်က PSMS Application Version 1.2 ကို စတင်အသုံးပြုနေပြီး သူတို့အလိုရှိတဲ့ လူ ၅ သောင်းခန့်ရဲ့ အချက်အလက်တွေကို ထည့်သွင်းထားတယ်လို့ ဆိုပါတယ်။
အဲဒီလွတ်မြောက်လာသူတွေဟာ ခေတ်မီနည်းပညာတွေနဲ့ ဆက်ပြီးစောင့်ကြည့်ခံနေရတာကြောင့် လူမှုအသိုင်းအဝိုင်းထဲ လွတ်လပ်စွာပြန်ဝင်ဆံ့ဖို့ခက်ခဲနေသလို ဒါဟာနိုင်ငံရေးဆိုင်ရာ ထုတ်ဖော်ပြောဆိုမှုတွေကို ဆက်ပြီးကန့်သတ်ထားဖို့ စစ်တပ်ကကြိုးပမ်းနေတာဖြစ်တယ်လို့ သုံးသပ်ထားကြပါတယ်။
အာဏာသိမ်းစစ်တပ်ဟာ လွတ်ငြိမ်းချမ်းသာခွင့် ၂ ကြိမ်အတွင်း အကျဉ်းသား ၄,၃၃၅ ဦး လွတ်ပေးခဲ့တယ်လို့ ထုတ်ပြန်ထားပေမယ့် မြန်မာနိုင်ငံတဝှမ်းက အကျဉ်းထောင်တွေကနေ တကယ်လွတ်လာသူက ၃,၁၉၄ ဦးခန့်ပဲရှိတယ်လို့ နိုင်ငံရေးအကျဉ်းသားများကွန်ယက်က ဆိုပါတယ်။
အဲဒီလိုနိုင်ငံတကာဟန်ပြ လွတ်ငြိမ်းပေးမှုထဲမှာ ၂၀၂၁ ခုနှစ်ကတည်းက ထောင်ဒဏ် ၁၂ နှစ် ချမှတ်ခံထားရတဲ့ နိုင်ငံတော်သမ္မတ ဦးဝင်းမြင့်၊ မှတ်တမ်းရုပ်ရှင်ဖန်တီးသူ မရှင်ဒေဝီနဲ့ ဗကသကျောင်းသားခေါင်းဆောင် ကိုလင်းထက်နိုင် (ခ) ကိုဂျိမ်းတို့လည်း ပါဝင်ခဲ့ပါတယ်။
