Border News Agency
အမေရိကန်၊ မေ ၂၀။
အမေရိကန်သမ္မတဒေါ်နယ်ထရမ့်အနေနဲ့ လွှတ်တော်ရဲ့ခွင့်ပြုချက်မရဘဲ အီရန်အပေါ် စစ်ရေးအရအင်အားသုံးတာကို တားဆီးနိုင်မယ့် စစ်ပွဲလုပ်ပိုင်ခွင့်ဆုံးဖြတ်ချက်ကို အမေရိကန်အထက်လွှတ်တော်က တိုးမြှင့်အတည်ပြုလိုက်ပါတယ်။
အဲဒီလွတ်တော်မှာ အင်္ဂါနေ့ကလုပ်ခဲ့တဲ့ လုပ်ထုံးလုပ်နည်းဆိုင်ရာမဲခွဲမှုမှာ ထောက်ခံမဲ ၅၀၊ ကန့်ကွက်မဲ ၄၇ မဲနဲ့ အတည်ပြုနိုင်ခဲ့တာဖြစ်ပြီး ရီပတ်ဘလစ်ကန်အမတ် တချို့ပါပူးပေါင်းပါဝင်ခဲ့တာကြောင့် သမ္မတအပေါ် ရှားရှားပါးပါး ငြင်းပယ်မှုတခုဖြစ်လာခဲ့ပါတယ်။
အဲဒီမဲခွဲမှုက အပစ်အခတ်ရပ်စဲရေးပျက်ပြယ်နေပြီး အဆုံးသတ်ဖို့လမ်းမမြင်ရသေးတဲ့ စစ်ပွဲအပေါ် ရီပတ်ဘလစ်ကန်အမတ် အနည်းငယ်ပိုပြီးစိုးရိမ်လာနေတာကို ပြသနေပါတယ်။
ဒီမိုကရက်တစ်အထက်လွှတ်တော် လူနည်းစုခေါင်းဆောင်ချပ်ရှူးမားကတော့ သမ္မတဟာ ကျည်ဆံအပြည့်ထည့်ထားတဲ့ သေနတ်နဲ့ဆော့နေတဲ့ ကလေးငယ်တဦးလိုဖြစ်နေတာကြောင့် အီရန်နဲ့ဖြစ်နေတဲ့ စစ်ပွဲကနေ စစ်တပ်တွေရုပ်သိမ်းဖို့ အခုကအချိန်အကောင်းဆုံးပဲလို့ မဲမခွဲခင်ပြောခဲ့ပါတယ်။
ဒါပေမယ့်ဒီဆုံးဖြတ်ချက်ဟာ လုပ်ထုံးလုပ်နည်းအရပဲ အတည်ပြုနိုင်သေးတာဖြစ်ပြီး အသက်ဝင်ဖို့အတွက် အခက်အခဲအများကြီး ကျန်ပါသေးတယ်။
လာမယ့်မဲခွဲမှုတွေမှာ စစ်ပွဲကိုထောက်ခံတဲ့ အမတ်တွေသာအင်အားပြည့်လာရင် ဒီဆုံးဖြတ်ချက်ပယ်ချခံရနိုင်သလို၊ ရီပတ်ဘလစ်ကန်တွေထိန်းချုပ်ထားတဲ့ အောက်လွှတ်တော်မှာပါ အတည်ပြုချက်ရဖို့ လိုအပ်နေပါသေးတယ်။
အမေရိကန်နဲ့အစ္စရေးတို့က ပြီးခဲ့တဲ့ဖေဖော်ဝါရီလနှောင်းပိုင်းမှာ စတင်ခဲ့တဲ့အီရန်စစ်ပွဲကြောင့် ကမ္ဘာ့လောင်စာဆီဈေးကွက်နဲ့ ကုန်ဈေးနှုန်းတွေကြီးမြင့်လာတာကြောင့် သမ္မတအပေါ် ဖိအားတွေ ပိုများလာနေပါတယ်။
အမတ်အချို့ကလည်း သမ္မတဟာ ရှင်းလင်းတဲ့ထွက်ပေါက်မရှိဘဲ အမေရိကန်ကို ရေရှည်စစ်ပွဲထဲ ဆွဲသွင်းနေတာလို့ စိုးရိမ်နေကြပေမယ့် ထရမ့်အစိုးရအဖွဲ့ကတော့ သူတို့လုပ်ရပ်ဟာ တရားဝင်ပြီး သမ္မတရဲ့ လုပ်ပိုင်ခွင့်အတွင်းမှာပဲ ရှိတယ်လို့ပြောပါတယ်။
၁၉၇၃ ခုနှစ် စစ်ပွဲလုပ်ပိုင်ခွင့်ဥပဒေအရ အမေရိကန်သမ္မတဟာ လွှတ်တော်ခွင့်ပြုချက်မရဘဲ ရက်ပေါင်း ၆၀ သာ စစ်ပွဲဆင်နွှဲခွင့်ရှိတာဖြစ်ပါတယ်။
သမ္မတထရမ့်ကတော့ မေလ ၁ ရက်နေ့မှာ အပစ်ရပ်စဲရေးပျက်ပြယ်သွားပြီလို့ ကြေညာခဲ့တာကြောင့် သူ့အနေနဲ့ ရက်ပေါင်း ၆၀ ကျော် စစ်ပွဲမဆင်နွှဲရသေးဘူးလို့ ဆိုထားပါတယ်။
