Border News Agency
ထိုင်း၊ မေ ၂၈။
အာဏာသိမ်းစစ်တပ်ရဲ့ လူ့အခွင့်အရေးချိုးဖောက်မှုတွေမှာ ငွေကြေးအရပါဝင်ပက်သက်နေတဲ့ ထိုင်းနိုင်ငံစွမ်းအင်ကုမ္ပဏီကြီးတွေကို စုံစမ်းစစ်ဆေးပေးဖို့ Blood Money Campaign (Myanmar/Burma) နဲ့ Campaign for a New Myanmar အဖွဲ့တို့က မေလ ၂၅ ရက်နေ့မှာ ထိုင်းနိုင်ငံလူ့အခွင့်အရေးကော်မရှင်ထံ တရားဝင်တိုင်ကြားစာ တင်သွင်းလိုက်ပါတယ်။
အဲဒီတိုင်ကြားခံရတဲ့အထဲမှာ PTT၊ PTTEP နဲ့ Northern Gulf Petroleum စတဲ့ ထိုင်းရေနံနဲ့ သဘာဝဓာတ်ငွေ့ကုမ္ပဏီကြီးတွေ ပါဝင်နေပြီး အဲဒီကုမ္ပဏီတွေရဲ့လုပ်ငန်းဆောင်ရွက်မှုတွေကြောင့် နယ်စပ်ဖြတ်ကျော် လူ့အခွင့်အရေးထိခိုက်မှုတွေဖြစ်နေတာကို အမြန်ဆုံးစုံစမ်းစစ်ဆေးပေးဖို့ တောင်းဆိုထားတာပါ။
၂၀၂၁ ခုနှစ် စစ်အာဏာသိမ်းပြီးနောက်ပိုင်း ဒီကုမ္ပဏီတွေကနေ အာဏာသိမ်းစစ်တပ်ဆီ စီးဝင်သွားတဲ့ဝင်ငွေတွေဟာ ပြည်သူတွေအပေါ် ရက်စက်တဲ့ ရာဇဝတ်မှုတွေကျူးလွန်ဖို့ လက်နက်ခဲယမ်းတွေဝယ်ယူရာမှာ အဓိကအားပေးထောက်ပံ့ရာရောက်နေတယ်လို့ ထောက်ပြထားပါတယ်။
ထိုင်းကုမ္ပဏီတွေဟာ အာဏာသိမ်းစစ်တပ်အတွက် တနှစ်ကို အမေရိကန်ဒေါ်လာ ၁ ဘီလီယံကျော်အထိ ဝင်ငွေဖန်တီးပေးနေပြီး စစ်တပ်ရဲ့ အကြီးဆုံး နိုင်ငံခြားငွေရင်းမြစ်ဖြစ်နေတယ်လို့ ဆိုပါတယ်။
အဲဒီ PTTEP ဟာ ရတနာနဲ့ ဇောတိကစီမံကိန်းတွေမှာ ထုတ်လုပ်မှုတိုးဖို့ အာဏာသိမ်းစစ်တပ်နဲ့ ညှိနှိုင်းနေသလို မင်းရဲသူစီမံကိန်းအတွက်လည်း MOGE နဲ့ သဘောတူညီချက်အသစ်တွေ လက်မှတ်ရေးထိုးထားတာကြောင့် လူ့အခွင့်အရေးအဖွဲ့တွေက ပြင်းပြင်းထန်ထန် ကန့်ကွက်ထားတာပါ။
ဒါကြောင့်မြန်မာပြည်သူတွေပိုင်ဆိုင်တဲ့ ဒီဓာတ်ငွေ့ဝင်ငွေတွေကို အာဏာသိမ်းစစ်တပ်လက်ထဲမထည့်ဘဲ အနာဂတ်ဒီမိုကရေစီအစိုးရအတွက် Escrow အကောင့်တွေထဲမှာပဲ ထိန်းသိမ်းထားဖို့၊ ရင်းနှီးမြှုပ်နှံမှုအသစ်တွေ ရပ်ဆိုင်းဖို့နဲ့ အာဏာသိမ်းစစ်တပ်ဆီငွေပေးချေတာတွေကို ချက်ချင်းရပ်တန့်ဖို့ လူ့အခွင့်အရေးအဖွဲ့တွေက တောင်းဆိုထားပါတယ်။
