Border News Agency
ပါကစ္စတန်၊ မေ ၃၁။
ပါကစ္စတန်နိုင်ငံကနေနေရပ်ပြန်လာကြတဲ့ အာဖဂန်ဒုက္ခသည်မိသားစုတွေကို သယ်ဆောင်လာတဲ့ကုန်တင်ကားတစီးဟာ အာဖဂန်နစ္စတန်အရှေ့ပိုင်း အဝေးပြေးလမ်းမကြီးပေါ်မှာတိမ်းမှောက်ခဲ့လို့ ကလေးငယ် ၁၀ ဦး အပါအဝင်အနည်းဆုံး ၁၄ ဦးထက်မက သေဆုံးခဲ့တယ်လို့ တာလီဘန်အာဏာပိုင်တွေရဲ့ ပြောကြားချက်အရ သိရပါတယ်။
အဲဒီဖြစ်စဉ်ဟာ လာ့ဂ်မန် (Laghman) ပြည်နယ်၊ ကာဂါရီ (Qarghayi) ခရိုင်အတွင်းမှာ မေလ ၃၀ ရက်နေ့ကဖြစ်ပွားခဲ့တာဖြစ်ပြီး ဒုက္ခသည်မိသားစုတွေနဲ့ သူတို့ရဲ့ အိမ်သုံးပစ္စည်းတွေကို အပြည့်တင်ဆောင်လာတဲ့ကုန်တင်ကားဟာ လမ်းချော်ကာမြောင်းထဲကို ထိုးကျတိမ်းမှောက်ခဲ့တာ ဖြစ်ပါတယ်။
ပြည်နယ်ကျန်းမာရေးတာဝန်ခံ အာမင်နူလာရှာရစ်ဖ် (Aminullah Sharif) ရဲ့ ပြောပြချက်အရ ယာဉ်မောင်းသူ အိပ်ငိုက်သွားတာကြောင့် အခုလို ကားတိမ်းမှောက်မှု ဖြစ်ပွားခဲ့တာလို့ သိရပါတယ်။
အဲဒီယာဉ်တိုက်မှုကြောင့် အခြားခရီးသည် ၃၀ ကျော်လည်း ထိခိုက်ဒဏ်ရာရရှိခဲ့ပြီး ဒဏ်ရာပြင်းထန်သူတချို့ကိုတော့ အိမ်နီးချင်းနန်ဂါဟာ (Nangarhar) ပြည်နယ်ရှိ ဆေးရုံတွေရဲ့ အထူးကြပ်မတ်ကုသဆောင်တွေဆီ ပို့ဆောင်ထားရပါတယ်။
အဲဒီသေဆုံး၊ ဒဏ်ရာရရှိခဲ့တဲ့ မိသားစုတွေဟာ ကူနာ (Kunar) ပြည်နယ်မှာ ယာယီနေထိုင်ခဲ့ကြပြီး ကာဘူးလ် (Kabul) မြို့တော်ဆီ ဦးတည်မောင်းနှင်လာစဉ် အခုလိုကြေကွဲဖွယ်ရာဖြစ်စဉ်နဲ့ ကြုံတွေ့ခဲ့ရတာ ဖြစ်ပါတယ်။
အာဖဂန်နစ္စတန်အမျိုးသား သဘာဝဘေးအန္တရာယ်ဆိုင်ရာ စီမံခန့်ခွဲမှုအဖွဲ့ကတော့ ထိခိုက်ခံစားရတဲ့ မိသားစုတွေအတွက် အရေးပေါ် ငွေကြေးထောက်ပံ့မှုအဖြစ် အာဖဂန်နီ ၇၃၀,၀၀၀ (အမေရိကန်ဒေါ်လာ ၁၀,၀၀၀ ခန့်) ပေးအပ်သွားမယ်လို့ ကြေညာထားပါတယ်။
ကုလသမဂ္ဂ (UN) ရဲ့ စာရင်းဇယားတွေအရ ပါကစ္စတန်အစိုးရက တရားမဝင်ရွှေ့ပြောင်းနေထိုင်သူတွေကို နှင်ထုတ်နေတာကြောင့် ယခုနှစ်အတွင်းမှာတင် အာဖဂန်ဒုက္ခသည် ၄၄၇,၀၀၀ ကျော် နေရပ်ပြန်လာခဲ့ကြရပြီး ဘေးကင်းလုံခြုံမှုမရှိတဲ့ ကုန်တင်ကားကြီးတွေပေါ်မှာ အတင်းအကျပ် ပိတ်ညှပ်စီးနင်း လိုက်ပါလာကြရတာကြောင့် အခုလိုသေဆုံးမှုတွေ ဖြစ်ပွားနေရတာဖြစ်ပါတယ်။
