Border News Agency
ထိုင်း၊ မေ ၃၁။
ထိုင်းနိုင်ငံ၊ ပထုန်ထာနီပြည်နယ်မှာ မေလ ၃၁ ရက်၊ ဒီနေ့ မနက်အစောပိုင်း ၁ နာရီအချိန်ခန့်က မော်တော်ဆိုင်ကယ်တစီးအရှိန်လွန်ပြီး လမ်းလယ်ကျွန်းအတားအဆီးကိုဝင်တိုက်မိလို့ ဆိုင်ကယ်ပေါ်ပါလာတဲ့ မြန်မာနိုင်ငံသား ၂ ဦး နေရာမှာတင် သေဆုံးသွားခဲ့တယ်လို့သိရပါတယ်။
အဲဒီသေဆုံးသူတွေကတော့ အသက် ၂၄ နှစ်အရွယ် မြန်မာနိုင်ငံသား ကိုစိုင်းနဲ့အသက် ၂၆ နှစ်အရွယ် မကေတို့ဖြစ်ကြပါတယ်။
သူတို့နှစ်ဦးဟာ အရှိန်ပြင်းလွန်းတာကြောင့် မော်တော်ဆိုင်ကယ်တိုက်မိချိန် အမျိုးသမီးဖြစ်သူမှာ ဦးခေါင်းပြတ်ထွက်သွားခဲ့ပြီး အမျိုးသားဖြစ်သူရဲ့ ရုပ်အလောင်းကလည်းလမ်းရဲ့တဖက်ခြမ်းအထိ လွင့်စင်ထွက်သွားခဲ့ရတာဖြစ်ပါတယ်။
သူတို့မောင်းနှင်လာတဲ့ Honda Forza 350 မော်တော်ဆိုင်ကယ်ဟာ Khlong 10 တံတားကို အရှိန်ပြင်းပြင်းနဲ့ မောင်းနှင်ကျော်တက်လာခဲ့တာလို့ ရဲတပ်ဖွဲ့ကပြောပါတယ်။
အဲဒီနောက်လမ်းလယ်ကြောက ကားတစီးကိုကျော်တက်ပြီး ညာဘက်အစွန်းဆုံးလမ်းကြောထဲ ကွေ့ဝင်လိုက်ချိန်မှာ ထိန်းချုပ်မှုလွတ်ကာ လမ်းလယ်ကျွန်း အတားအဆီးကို ပြင်းပြင်းထန်ထန် ဝင်တိုက်မိခဲ့တာဖြစ်ပြီး ဆိုင်ကယ်ဟာ မီတာ ၂၀ ခန့်အကွာအထိ လဲကျလျှောတိုက်သွားခဲ့တယ်လို့ သိရပါတယ်။
ယာဉ်ထိန်းရဲတပ်ဖွဲ့ကအခင်းဖြစ်ပွားရာနေရာကို စစ်ဆေးရာမှာ အခြားတိုက်မိထားတဲ့ ယာဉ်တစုံတရာ မတွေ့ရှိရဘဲ ဆိုင်ကယ်တစီးတည်း အရှိန်လွန်တိုက်မိတာလို့ ယူဆရပေမယ့် အခြားယာဉ်တွေနဲ့ ငြိစွန်းမှု ရှိ၊ မရှိ သေချာစေဖို့အတွက် အနီးအနားက CCTV မှတ်တမ်းတွေကို ပြန်လည်စစ်ဆေးနေပါတယ်။
အဲဒီသေဆုံးသူတွေရဲ့ ရုပ်အလောင်းတွေကို လူမှုကူညီရေးအသင်းတွေက ဆေးရုံသို့ ပို့ဆောင်ထားရှိတယ်လို့ သိရပါတယ်။
