Border News Agency
နတ်မောက်၊ ဇွန် ၂။
မကွေးတိုင်း၊ နတ်မောက်မြို့နယ်မှာ အာဏာသိမ်းစစ်တပ်ရဲ့တပ်ကြပ်တဦးကို တော်လှန်ရေးတပ်တွေမှ ဖမ်းဆီးရမိခဲ့တယ်လို့ သရက်ခရိုင်အမှတ် ၃ ငါးပြေမတပ်ရင်းက ဇွန်လ ၁ ရက်နေ့က ထုတ်ပြန်ပါတယ်။
အဲဒီထန်းပင်ကုန်းကြီးကျေးရွာနဲ့ ညောင်အိုင်ကျေးရွာကြားခရိုင်ချင်းဆက်လမ်းပိုင်းမှာ မေလ ၃၀ ရက်၊ မနက် ၈ နာရီမှာ စစ်တပ် ဆသလ ၂ တပ်ရင်းက တပ်ကြပ်ရန်နိုင်ကို ဒဏ်ရာတွေနဲ့ ဖမ်းဆီးရမိခဲ့တာလို့ဆိုပါတယ်။
တပ်ကြပ်ရန်နိုင်ဟာ မေလ ၂၉ ရက်နေ့က စစ်တပ်အမှတ် ၉၆၇ ဆောက်လုပ်ရေးတပ်ခွဲမှ တပ်သားကျော်ဦးနဲ့အတူ နတ်မောက်မြို့နယ်၊ ရွှေပန်းတောကျေးရွာမှ လစာထုတ်ပြီးအပြန် လမ်းမှာစကားများရန်ဖြစ်လို့ အချင်းချင်းသတ်ဖြတ်ကြရာ တပ်သားကျော်ဦးသေဆုံးခဲ့တယ်လို့ ဆိုပါတယ်။
တပ်ကြပ်ရန်နိုင်နဲ့အတူ ဆသလ ၂ ကိုယ်ပိုင်ကဒ်ပြား၊ ဖုန်းနဲ့ ငွေသားလေးသိန်းသုံးသောင်းကျပ်ကို သိမ်းဆည်းရမိခဲ့တယ်လို့ ဆိုပါတယ်။
ပြည်သူတွေအနေနဲ့ အာဏာသိမ်းစစ်တပ်နဲ့နီးကပ်စွာ သွားလာနေထိုင်တာတွေမပြုကြဖို့နဲ့ တော်လှန်ရေးတပ်ဖွဲ့တွေရဲ့ လှုပ်ရှားသွားလာတာတွေတွေ့ရင် ခြေသံလုံလုံနဲ့သွားလာနိုင်ဖို့ အထူးသတိထားစောင့်ထိန်းပေးကြဖို့ သရက်ခရိုင် အမှတ် ၃ ငါးပြေမတပ်ရင်းက အသိပေးထားပါတယ်။
