Border News Agency
ထိုင်း၊ ဇွန် ၁၂။
ထိုင်းဘုရင်မဟာဝဇီရာလောင်ကွန်းရဲ့ အကြီးဆုံးသမီးတော် တော်ဝင်မင်းသမီး ဖာချရာ ခစ်တရားဖားနရင်ဒရာဒေဗျာဗတီဟာ သက်တော် ၄၇ နှစ်အရွယ်မှာ ကွယ်လွန်သွားပြီလို့ နန်းတော်အုပ်ချုပ်ရေးရုံးက ဇွန်လ ၁၂ ရက်၊ ဒီနေ့ထုတ်ပြန်ပါတယ်။
မင်းသမီးဟာ ၂၀၂၂ ခုနှစ်ကတည်းက နှလုံးရောဂါအခြေအနေကြောင့် ဆေးရုံတက်ရောက် ကုသမှုခံယူနေရတာပါ။
နောက်ပိုင်းမှာတော့ ဝမ်းဗိုက်ပိုင်းပိုးဝင်တာနဲ့အတူ ကျန်းမာရေးအခြေအနေတွေ ဆက်တိုက်ဆိုးရွားလာခဲ့ပြီး ဆရာဝန်တွေအစွမ်းကုန် ကြိုးပမ်းကုသပေးခဲ့ပေမယ့် ဇွန်လ ၁၁ ရက်၊ မနေ့ည ၇ နာရီ ၄၈ မိနစ်မှာပဲ ငြိမ်းချမ်းစွာကွယ်လွန်သွားခဲ့တာ ဖြစ်ပါတယ်။
အခုလိုကွယ်လွန်သွားတဲ့အတွက် ဘုရင်မင်းမြတ်က နန်းတော်ထုံးတမ်းစဉ်လာနဲ့အညီ အမြင့်ဆုံးဂုဏ်ထူးဆောင် ဈာပနအခမ်းအနားကို ကျင်းပပေးဖို့ စီစဉ်ထားပါတယ်။
မင်းသမီးရဲ့ ရုပ်ကလာပ်တော်ကိုလည်း ပြည်သူတွေ ဂါရဝပြုနိုင်ဖို့အတွက် Grand Palace နန်းတော်မှာ ထားရှိသွားမှာပါ။
မင်းသမီးဟာ ထိုင်းနိုင်ငံရဲ့ အရေးပါတဲ့ မင်းသမီးတပါး ဆုံးရှုံးသွားတဲ့အတွက် ထိုင်းပြည်သူတွေအကြားမှာလည်း စိတ်မကောင်းစရာဖြစ်ရပ်တခု ဖြစ်ခဲ့ရပါတယ်။
