Border News Agency
နေပြည်တော်၊ဇွန် ၂၄။
ပြည်သူတွေရဲ့ လိုလားချက်နဲ့ အစိုးရရဲ့ မူဝါဒတွေ ကိုက်ညီစေဖို့အတွက် ပြည်သူ့အသံကို နားထောင်ပြီး အခက်အခဲတွေကို ဖြေရှင်းပေးကြဖို့ သမ္မတတုက ဇွန်လ ၂၃ ရက်နေ့မှာ မှာကြားလိုက်ပါတယ်။
သမ္မတတုက ပြည်ထောင်စုဝန်ကြီးတွေ၊ ဝန်ကြီးချုပ်တွေနဲ့ တာဝန်ရှိသူတွေကို အခုလို အစည်းအဝေးမှာ ပြောခဲ့တာဖြစ်ပြီး ပြည်သူတွေ စိတ်ချမ်းသာစွာ လုပ်ကိုင်စားသောက်နိုင်ဖို့ သူတို့ရဲ့ လိုအပ်ချက်တွေကို မှန်မှန်သိရှိအောင် လုပ်ဆောင်ရမယ်လို့ ဆိုပါတယ်။
အစိုးရရဲ့ မူဝါဒတွေ ချမှတ်ဆောင်ရွက်ရာမှာ ပြည်သူတွေရဲ့ ဆန္ဒကို လျစ်လျူရှုလို့ မဖြစ်ကြောင်း၊ပညာရေး၊ ကျန်းမာရေး၊ လူမှုရေး ကဏ္ဍအလိုက် လိုလားချက်တွေကို သိအောင်လုပ်ဖို့နဲ့ ဝန်ထမ်းတွေရဲ့ အခက်အခဲတွေကိုလည်း တတ်နိုင်သမျှ ဖြည့်ဆည်းကူညီပေးဖို့ မှာကြားခဲ့ပါတယ်။
ဒါပေမယ့်လည်း လက်ရှိ မြေပြင်အခြေအနေမှာ အာဏာသိမ်းစစ်တပ်ရဲ့ လေကြောင်း၊လက်နက်ကြီး ပစ်ခတ်တိုက်ခိုက်မှုတွေကြောင့် အရပ်သားပြည်သူတွေ နေ့စဥ်နဲ့အမျှ သေဆုံး၊ဒဏ်ရာရနေကြသလို ကျေးရွာတွေကို ရွယ်ရည်ချက်ရှိရှိမီးရှို့ဖျက်စီးနေတာတွေကြောင့်လည်း အိုးအိမ်စွန့်ခွာ ထွက်ပြေးနေကြရတယ်လို့ ပြည်သူတွေကဆိုကြပါတယ်။
အဲဒီအပြင် မတရားဖမ်းဆီးတာနဲ့ ဖိနှိပ်မှုတွေမှာ ပိုမိုဆိုးရွားလာနေပြီး ပြည်သူတွေမှာ အသက်အန္တရာယ်စိုးရိမ်ရတဲ့ အခြေအနေအခက်အခဲပေါင်းစုံကို နေ့စဉ် ရင်ဆိုင်ဖြတ်သန်းနေကြရဆဲ ဖြစ်ပါတယ်။
