Border News Agency
မြောက်ဦး၊ဇွန် ၂၇။
အာရက္ခဒေသက လယ်သမားတွေ စိုက်ပျိုးစရိတ်သက်သာပြီး စပါးထွက်နှုန်းကောင်းမွန်စေဖို့အတွက်ဓာတ်မြေဩဇာနဲ့ သဘာဝမြေဩဇာတွေကို ဈေးနှုန်းသက်သာစွာနဲ့ စနစ်တကျ ဖြန့်ဖြူးရောင်းချပေးတော့မယ်လို့ အာရက္ခပြည်သူ့တော်လှန်ရေးအစိုးရ စိုက်ပျိုးရေးနဲ့မွေးမြူရေးဌာနကနေ သိရပါတယ်။
အဲဒီ လယ်သမားတွေဟာ သွင်းအားစုစရိတ် ကြီးမားတဲ့ဝန်ထုပ်ဝန်ပိုးနဲ့ရင်ဆိုင်နေရတာကြောင့် အစိုးရကမြေဩဇာတွေကို လယ်သမားတွေလက်ထဲ တိုက်ရိုက်ရောက်အောင် ဂိုဒေါင်ထုတ်ဈေးနှုန်းအတိုင်း စီစဉ်ပေးတာဖြစ်ပြီး အလွယ်တကူ ဝယ်ယူနိုင်ဖို့ ခရိုင်နဲ့ မြို့နယ်အလိုက် သယ်ယူပို့ဆောင်ရေး အစီအစဉ်တွေကိုလည်း စနစ်တကျ ချမှတ်ထားပါတယ်။
မြောက်ဦး၊မင်းပြားနဲ့ စစ်တွေခရိုင် အပါအဝင် အခြားခရိုင်၊မြို့နယ်တွေမှာလည်း တူညီတဲ့ဈေးနှုန်းတွေအတိုင်း ဝယ်ယူနိုင်မှာဖြစ်ပြီး အိန္ဒိယ Urea (အဖြူ) တအိတ်ကို ၉၅,၀၀၀ ကျပ်၊အိန္ဒိယ DAP (အမဲ) တစ်အိတ်ကို ဥက္ကဋ္ဌထုတ်ဈေးအတိုင်း ၂၀၀,၀၀၀ ကျပ်နဲ့ သဘာဝမြေဩဇာ (၁၅ ကီလို) တစ်အိတ်ကို ၃၂,၀၀၀ ကျပ် နှုန်းတွေနဲ့ ရောင်းချပေးမှာဖြစ်ကာ ဂိုဒေါင်ကနေ သယ်ယူစရိတ်ကိုတော့ ဝယ်ယူသူဘက်က ကျခံရမှာ ဖြစ်ပါတယ်။
မြေဩဇာတွေကို လယ်သမားအားလုံး လက်ဝယ်ရရှိစေဖို့အတွက် လယ်သမားတဦးဟာ အိတ် ၁ အိတ်ကနေ ၁၀ အိတ်အထိ ထောက်ခံစာမလိုဘဲ ဝယ်ယူနိုင်ပြီး အိတ် ၁၀ အိတ်ထက်ကျော်ရင်တော့ လယ်သမားဖြစ်ကြောင်း ရပ်ကျေးအုပ်ချုပ်ရေးမှူးရဲ့ ထောက်ခံစာနဲ့ ဝယ်ယူရမှာ ဖြစ်ပါတယ်။
အဲဒီအပြင် အထူးခံစားခွင့်အနေနဲ့ ရပ်ရွာအလိုက် လယ်သမားတွေစုပေါင်းပြီး အိတ်ရေ ၁၂၀ နဲ့အထက်ဝယ်ယူမယ်ဆိုရင်တော့ စိုက်ပျိုးရေးဌာနခွဲကနေ သယ်ယူစရိတ်အခမဲ့နဲ့ အိမ်တိုင်ရာရောက် ပို့ဆောင်ပေးမှာဖြစ်သလို၊ ငွေကြေးကျပ်တည်းပြီး ရင်းနှီးစရိတ် အခက်အခဲရှိနေတဲ့ ဆင်းရဲနွမ်းပါးတဲ့ လယ်သမားတွေအတွက်လည်း တလဆိုင်းငံ့ အကြွေးစနစ်နဲ့ ကူညီရောင်းချပေးသွားမယ်လို့ သိရပါတယ်။
