Border News Agency
အိန္ဒိယ၊ဇူလိုင် ၂၃။
အိန္ဒိယနိုင်ငံရဲ့ ပညာရေးစနစ် ပြုပြင်ပြောင်းလဲရေး ကျောင်းသား ဆန္ဒပြပွဲအတွင်း ဖမ်းဆီးထိန်းသိမ်းခံခဲ့ရတဲ့အတိုက်အခံခေါင်းဆောင် ရာဟုလ်ဂန္ဒီပြန်လွတ်လာခဲ့ပြီး အတိုက်အခံပါတီတွေကလည်း ပညာရေးဝန်ကြီး နုတ်ထွက်ပေးဖို့ လွှတ်တော်မှာတောင်းဆိုဆန္ဒပြခဲ့ကြပါတယ်။
ဆေးတက္ကသိုလ်ဝင်ခွင့် စာမေးပွဲ မေးခွန်း ပေါက်ကြားမှုကြောင့် ကျောင်းသားဆယ့်နှစ်ဦးထက်မနည်း သေကြောင်းကြံစည်ခဲ့ရတဲ့ အဖြစ်ဆိုးနဲ့ပတ်သက်လို့ ဝန်ကြီးချုပ် မိုဒီနဲ့ ပညာရေးဝန်ကြီး ဓရ်မေန္ဒြ ပရာဓာန်တို့ နုတ်ထွက်ပေးဖို့ “Cockroach Janta Party” (CJP) အမည်ရှိလူငယ်လှုပ်ရှားမှုအဖွဲ့က ဦးဆောင်ကာ တောင်းဆိုနေကြတာဖြစ်ပါတယ်။
ရာဟုလ်ဂန္ဒီနဲ့အတိုက်အခံ ခေါင်းဆောင်တွေဟာ ဝန်ကြီးချုပ်မိုဒီရဲ့ နေအိမ်ရှေ့မှာ ထိုင်သပိတ်မှောက် ဆန္ဒပြစဉ် အင်္ဂါနေ့က ထိန်းသိမ်းခံခဲ့ရတာဖြစ်ပြီး အဲဒီနေ့ ညမှာ လွတ်မြောက်လာခဲ့တာဖြစ်ပါတယ်။
ပညာရေးဝန်ကြီးက အတိုက်အခံတွေဟာ ကျောင်းသားတွေကို နိုင်ငံရေး ကိရိယာအဖြစ် အသုံးချနေတယ်လို့ စွပ်စွဲပြစ်တင်ထားပါတယ်။
ဇူလိုင်လ ၂၂ ရက်နေ့မှာ မြို့တော် နယူးဒေလီရှိ ဂျန်တာမန်တာဆန္ဒပြကွင်းပြင်မှာ လူပေါင်း တထောင်ကျော်ဆက်လက် တပ်စွဲထားကြပြီး ဆန္ဒပြပွဲတွေအရှိန်မြင့်လာတာကြောင့်မြို့တော်ရှိ မက်ထရို ရထားဘူတာဆယ့်ခြောက်ခုထက်မနည်းကို ပိတ်ထားရပါတယ်။
အဲဒီလူငယ်လှုပ်ရှားမှု ဆန္ဒပြပွဲတွေဟာ မြို့တော် နယူးဒေလီအပြင် မွန်ဘိုင်း၊ ဘင်္ဂလူရူး၊ ကာလကတ္တားနဲ့ အာမက်ဒါဘတ် စတဲ့ မြို့ကြီးတွေကိုပါ ကူးစက် ပျံ့နှံ့နေပါတယ်။
