Border News Agency
မြောက်ဦး၊ သြဂုတ် ၁။
အာရက္ခပြည်သူ့တော်လှန်ရေးအစိုးရရဲ့ မြောက်ဦးမြို့နယ်အုပ်ချုပ်ရေးမှူးရုံးဝန်ထမ်းအားလုံးကို စစ်သင်တန်းတက်ခိုင်းတာ ပြန်စဥ်စားပေးကြဖို့ မိဘတွေတောင်းဆိုနေကြပါတယ်။
အဲဒီမြောက်ဦးမြို့နယ်အုပ်ချုပ်ရေးမှူးရုံးမှ အိမ်ထောင်သည်လေးဦးအပါအဝင် အမျိုးသမီးရှစ်ဦး၊ အမျိုးသားကိုးဦးစုစုပေါင်းဆယ့်ခုနှစ်ဦးကို ဇူလိုင်လ ၃၁ရက်၊မနေ့က စစ်သင်တန်းတက်ဖို့ ပို့လိုက်တာလို့ မိသားစုဝင်တွေ၊ မိဘတွေက ဆိုကြပါတယ်။
“ညနေပိုင်းချက်ချင်းသင်တန်းကျောင်းကိုပို့လိုက်ကြတာပါ။ မိသားစုဝင်တွေ၊ မိဘတွေတောင် မတွေ့လိုက်ရသူတွေ၊ မသိလိုက်ကြသူတွေရှိကြပါတယ်။ နောက်ပြီး ကျန်းမာရေးမကောင်းသူတွေ၊ စစ်သင်တန်းတက်ပြီးသားသူတွေလည်းပါသွားပါတယ်။ စပယ်အောင်နဲ့ စိုးထွန်းတိုင်တာကြောင့် တင်ခိုင်းတာပါ။”လို့ မိသာစုဝင်တဦးက Border News Agency ကို ပြောပါတယ်။
အဲဒီအထဲမှာ အိမ်ထောင်သည်လေးဦးပါဝင်သလို ကျန်းမာရေးအားနည်းသူတွေ၊ စစ်သင်တန်းတက်ထားသူတွေလည်းပါဝင်ပေမယ့် မြောက်ဦးခရိုင်ဒုတိယမြို့နယ်အုပ်ချုပ်ရေးမှူးစိုးထွန်း (ကောင်းမြတ်ကျော်)အမိန့်နဲ့ စေလွှတ်လိုက်တာလို့ မိသားစုဝင်တွေ၊ မိဘတွေက ဆိုကြပါတယ်။
အဲဒီမြောက်ဦးခရိုင်ဒုတိယမြို့နယ် အုပ်ချုပ်ရေးမှူးစိုးထွန်း(ကောင်းမြတ်ကျော်)ဟာ အာရက္ခတပ်တော်(AA)တပ်မှူးချုပ်၊ ဗိုလ်ချုပ်ထွန်းမြတ်နိုင်ရဲ့အကိုအရင်း၊ ရက္ခိုင့်အမျိုးသားအဖွဲ့ချုပ်(UL A)ရဲ့အထွေထွေအတွင်းရေးမှူး ၃ ထွန်းမင်းနိုင်ကို တိုင်ကြားတယ်လို့ မိသားစုဝင်တွေ၊ မိဘတွေက ဆိုကြပါတယ်။
အဲဒီမြောက်ဦးခရိုင်ဒုတိယမြို့နယ် အုပ်ချုပ်ရေးမှူးစိုးထွန်း(ကောင်းမြတ်ကျော်)ဟာ ရက္ခိုင့်အမျိုးသားအဖွဲ့ချုပ် (UL A)ရဲ့အထွေထွေအတွင်းရေးမှူး ၃ ထွန်းမင်းနိုင်ရဲ့ လူယုံတပည့်ရင်းဖြစ်တာမို့ မြောက်ဦးခရိုင်ဒုတိယမြို့နယ် အုပ်ချုပ်ရေးမှူးစိုးထွန်း(ကောင်းမြတ်ကျော်)ပြောဆိုတိုင်းကြားချက်တွေကို အရေးယူလုပ်ပေးသလို အထူးအခွင့်အရေးတွေပေးထားတယ်လို့ အာရက္ခပြည်သူ့တော်လှန်ရေးအစိုးရရဲ့ အုပ်ချုပ်ရေးအသိုင်းအဝိုင်းကဆိုကြပါတယ်။
အဲဒီလိုလုပ်နေကြတာဟာ ကိုယ့်လူသူ့လူအင်အားစုပြီး အားပြိုင်နေကြသလိုဖြစ်နေပြီး အာရက္ခပြည်သူ့တော်လှန်ရေးအစိုးရဝန်ထမ်းအချင်းချင်းကြားမှာသွေးကွဲမှုတွေဖြစ်လာစေနိုင်တယ်လို့ အာရက္ခပြည်သူ့တော်လှန်ရေးအစိုးရရဲ့ အုပ်ချုပ်ရေးအသိုင်းအဝိုင်းက ဆိုကြပါတယ်။
“ကျမတို့ကတော့ အာဏာရှင်ကိုတော်လှန်နေရင်း အာဏာရှင်တွေဆက်မလိုချင်တော့ပါဘူး။ အမျိုးသားရေးအသိစိတ်နဲ့ လစာမရဘဲဝင်လုပ်ပေးနေကြတာပါ။တချို့မိဘတွေကတော့ ငိုကြပါတယ်။ ကျမတို့သားသမီးတွေကို လိုအပ်လို့တက်ခိုင်းတာသာဖြစ်စေချင်ပါတယ်။ မကျေနပ်လို့၊ တိုင်လို့ အတင်းအဓမ္မစေခိုင်းတာကိုတော့ ပြန်စဥ်စားပေးစေချင်ပါတယ်။”လို့ မိဘတဦးက Border News Agency ကို ပြောပါတယ်။
အာရက္ခအဆုံးအဖြတ်စစ်ပွဲမှာ အာရက္ခတပ်တော်ဟာ ပလက်ဝဒေသအပါအဝင်တဆယ့်ငါးမြို့နယ်ကို အပြီးသတ်သိမ်းပိုက်ထိန်းချုပ်ထားပြီး အာရက္ခပြည်သူ့တော်လှန်ရေးအစိုးရအဖြစ်အုပ်ချုပ်ရေးယန္တရားတွေ ဖော်ဆောင်နေပါတယ် ။
အဲဒီတဆယ့်ငါးမြို့နယ်ကို ခရိုင်ရှစ်ခုသတ်မှတ်ထားပြီး ခရိုင်၊ မြို့နယ်၊ တိုက်နယ်၊ ရပ်ရွာအဆင့်ထိ အုပ်ချုပ်ရေးမှူး၊ ဒုတိယအုပ်ချုပ်ရေးမှူးတွေခန့်ကာ အုပ်ချုပ်ရေးယန္တရားတွေဖော်ဆောင်နေပါတယ်။
အဲဒီရက္ခိုင့်အမျိုးသားအဖွဲ့ချုပ်(ULA) ရဲ့ အထွေထွေအတွင်းရေးမှူး ၃ ထွန်းမင်းနိုင်ဝါ လူသားချင်းစာနာထောက်ထားရေးနဲ့ဖွံ့ဖြိုးရေးဆိုင်ရာပူးပေါင်း ဆောင်ရွက်ရေးရုံး(HDCO)မှာလည်း အကြီးအကဲတာဝန်ယူဆောင်ရွက်နေပြီး အာရက္ခပြည်သူ့တော်လှန်ရေးအစိုးရတဖွဲ့လုံးမှာ သြဇာအာဏာအရှိဆုံးအဖွဲ့၊ သြဇာအာဏာအရှိဆုံးသူအဖြစ်လုပ်နေတယ်လို့ အာရက္ခပြည်သူ့တော်လှန်ရေးအစိုးရအသိုင်းအဝိုင်းက ဝေဖန်ပြောဆိုနေကြပါတယ်။
