Border News Agency
ဧရာဝတီ၊ သြဂုတ် ၃။
ဧရာဝတီတိုင်း၊ လေးမျက်နှာမြို့နယ်နဲ့ ငါးသိုင်းချောင်းကားလမ်းမပေါ်မှာရှိတဲ့ တံတားအမှတ် (၂/၆) ဟာ သြဂုတ်လ ၃ ရက်၊ ဒီနေ့မနက်ကရေတိုက်စားမှုကြောင့် ရေစီးနဲ့အတူမျောပါသွားခဲ့တယ်လို့ မြို့နယ်ပြန်ကြားရေးနဲ့ ပြည်သူ့ဆက်ဆံရေးဦးစီးဌာနက ထုတ်ပြန်ပါတယ်။
ငဝန်ရေကာတာကျိုးပေါက်တာကြောင့် ရေတွေအရှိန်အဟုန်နဲ့စီးဝင်လာပြီး လက်သမား(ကရင်)ကျေးရွာအနီးကအလျား တဆယ့်ငါးပေ၊ အနံ တဆယ့်နှစ်ပေရှိ ကွန်ကရစ်တံတားအသေး ရေစီးနဲ့ပါသွားကာ အနီးနားကလယ်ကွင်းတွေဆီ ရေတွေစီးဆင်းနေတာပါ။
ငဝန်မြစ် ရေကာတာကျိုးပေါက်မှုကြောင့် လေးမျက်နှာမြို့နယ်မှာ ဩဂုတ် ၃ ရက်အထိ စာရင်းတွေအရ ရပ်ကွက်ငါးခု၊ ကျေးရွာတဆယ့်လေးရွာက အိမ်ခြေသုံးထောင်တရာငါးဆယ့်ရှစ် အိမ်နဲ့လူဦးရေ တသောင်းလေးထောင်ကျော်ရေဘေးသင့်ခဲ့တယ်လို့ သမ္မတရုံး ပြောရေးဆိုခွင့်ရှိသူ ဒေါက်တာခိုင်ခိုင်စိုးကပြောပါတယ်။
လက်ရှိမှာတော့ လေးမျက်နှာမြို့နယ်အတွင်း ရေဘေးကယ်ဆယ်ရေးစခန်း ကိုးခုဖွင့်လှစ်ထားရှိပြီး လာရောက်ခိုလှုံသူ အိမ်ထောင်စုလေးရာလေးဆယ့်တစုနဲ့ လူဦးရေတထောင်လေးရာကျော်ရှိနေတယ်လို့ ဆိုပါတယ်။
