Border News Agency
သံတွဲ၊ ဩဂုတ် ၁၆။
သံတွဲမြို့ပေါ်ရှိအမှတ် ၈၊(က) ရပ်ကွက်ကို ဩဂုတ်လ ၁၆ ရက်၊ဒီနေ့ မနက် ၆ နာရီ ၄၀ မိနစ်အချိန်ခန့်မှာ အာဏာသိမ်းစစ်တပ်လေကြောင်းတိုက်ခိုက်ခဲ့တယ်လို့ အာရက္ခတပ်တော်(AA)က ထုတ်ပြန်ပါတယ်။
အဲဒီလိုလေကြောင်းတိုက်ခိုက်ခဲ့တာကြောင့် အမှတ် ၈၊(က) ရပ်ကွက်မှာနေထိုင်တဲ့ အသက်ငါးဆယ်အရွယ် ဦးမင်းနောင်နဲ့ အသက်ဆယ့်လေးနှစ်အရွယ် သမီးဖြစ်သူမချွန်းလဲ့ရွှေရည်တို့သားအဖနှစ်ဦးသေဆုံးခဲ့ရပါတယ်။
အဲဒီအပြင်အသက်လေးဆယ်ငါးနှစ်အရွယ် ဦးဇေယျာမင်းလွှင်၊အသက်နှစ်နှစ်အရွယ် မောင်ရွှေမိုးယံဇော်နဲ့ အသက်လေးဆယ်အရွယ် ဒေါ်ဌေးဌေးမော်တို့သုံးဦးမှာလည်း ဒဏ်ရာပြင်းပြင်းထန်ထန်ရသွားခဲ့ပါတယ်။
နောက်ပြီးသန့်ရှင်းရေးဝန်ထမ်းသုံးဦးလည်း ဒဏ်ရာရသွားသလို လူနေအိမ်နဲ့အဆောက်အအုံရှစ်လုံးလည်းပျက်စီးခဲ့ပါတယ်။
အဲဒီသံတွဲမြို့နယ်၊မောင်ရွှေလေးကျေးရွာ အနီးဝန်းကျင်ကို ဒီနေ့မနက် ၆ နာရီ ၄၅ မိနစ်အချိန်ကလည်း အာဏာသိမ်းစစ်တပ်ကလေကြောင်းတိုက်ခိုက်ခဲ့တယ်လို့ဆိုပါတယ်။
အာဏာသိမ်းစစ်တပ်ဟာ ခုရက်ပိုင်းအတွင်း သံတွဲမြို့နယ်ကို လေကြောင်းတိုက်ခိုက်တာတွေပိုလုပ်လာတာကြောင့် ပြည်သူတွေအနေနဲ့ အာဏာသိမ်းစစ်တပ်ရဲ့ လေကြောင်းနဲ့ရေကြောင်းအန္တရာယ်ကို သတိထားကြဖို့ အာရက္ခတပ်တော်က ထပ်ပြီးအသိပေးထားပါတယ်။
