Border News Agency
အိန္ဒိယ၊ ဩဂုတ် ၃၀။
အိန္ဒိယနိုင်ငံ၊အာရုဏာချယ်ပရာဒေးရှ်ပြည်နယ်၊ချန်လန်းခရိုင်၊နမ်ပုံးဒေသအနီးမှာ မြန်မာနိုင်ငံသားနှစ်ဦးကို မူးယစ်ဆေးဝါးတွေနဲ့အတူ အာသံရိုင်ဖယ်တပ်ဖွဲ့ကဖမ်းဆီးရမိခဲ့ပါတယ်။
အဲဒီနမ်ပုံးဒေသမှာ ဩဂုတ်လ ၂၈ ရက်နေ့က မူးယစ်ဆေးဝါးမှောင်ခိုကူးသန်းနေကြောင်း သတင်းအချက်အလက်အရသွားရောက်ရှင်းလင်းရာမှ တရားမဝင်ဝင်ရောက်လာတဲ့ မြန်မာနိုင်ငံသားနှစ်ဦးကို ဖမ်းဆီးရမိခဲ့တာပါ။
အဲဒီဖမ်းဆီးရမိသူတွေဆီမှ အိန္ဒိယရူပီနှစ်ဆယ့်လေးသိန်းကျော်တန်ဖိုးရှိ ဟီးရိုးအင်းတရာ့သုံးဆယ်ဂရမ်ကို သိမ်းဆည်းရမိခဲ့ပါတယ်။
အဲဒီဖမ်းဆီးရမိထားသူနှစ်ဦးနဲ့ သိမ်းဆည်းရမိတဲ့မူးယစ်ဆေးဝါးတွေကို ဆက်လက်စစ်ဆေးမေးမြန်းဖို့ သက်ဆိုင်ရာရဲတပ်ဖွဲ့ဆီလွှဲပြောင်းပေးထားပါတယ်။
အိန္ဒိယ-မြန်မာနယ်စပ် နမ်ပုံးဒေသဟာ တောတောင်ထူထပ်ပြီး နယ်စပ်စည်းမျဉ်းထိန်းချုပ်ရခက်ခဲတာကြောင့် မူးယစ်ဆေးဝါးနဲ့ တရားမဝင်ပစ္စည်းမှောင်ခိုကူးသူတွေ အဓိကအသုံးပြုလေ့ရှိတဲ့ လမ်းကြောင်းတခုဖြစ်ပါတယ်။
အဲဒီအပြင် နယ်စပ်ဒေသတွေမှာ မူးယစ်ဆေးဝါးကူးသန်းရောင်းဝယ်မှု ပိုမိုများပြားလာနေတာကြောင့် အိန္ဒိယလုံခြုံရေးတပ်ဖွဲ့တွေက နယ်စပ်တလျှောက်စစ်ဆေးရေးနဲ့ ကင်းလှည့်မှုတွေကို အရှိန်အဟုန်မြှင့်တင်းကြပ်ထားပါတယ်။
