Border News Agency
ရသေ့တောင်၊ အောက်တိုဘာ ၃။
အာရက္ခတပ်တော်(AA)ထိန်းချုပ်ထားတဲ့ ရသေ့တောင်မြို့နယ်ရှိ မြို့ပေါ်ရပ်ကွက်တွေနဲ့ ကျေးရွာတွေကို အောက်တိုဘာလ ၃ ရက်၊ဒီနေ့မနက်အစောပိုင်းက အာဏာသိမ်းစစ်တပ်လေကြောင်းတိုက်ခိုက်ခဲ့တာကြောင့် နှစ်ဦးသေဆုံးပြီး တဆယ်ကျော်ဒဏ်ရာရသွားခဲ့ပါတယ်။
ရသေ့တောင်မြို့နယ်၊ပြားချောင်းကြီးကျေးရွာနဲ့ပြင်ခေါင်ကျေးရွာအပါအဝင် တောင်ရင်းတန်းရပ်ကွက်၊အရှေ့တောင်ရပ်ကွက်နဲ့ ကမ်းနားလမ်းတလျှောက်ကို ဒီနေ့ မနက် ၁ နာရီခွဲအချိန်မှာ အာဏာသိမ်းစစ်တပ်က Y-12 လေယာဉ်ကနေ ဗုံးသီးခြောက်လုံးနဲ့တိုက်ခိုက်ခဲ့တာဖြစ်ပါတယ်။
အဲဒီလိုတိုက်ခိုက်ခဲ့တာကြောင့် ရသေ့တောင်မြို့နယ်၊ချွတ်ပြင်ကျေးရွာမှ ဦးမောင်ကျော်ကျာ်ဝေရဲ့သမီး အသက်ဆယ့်ငါးနှစ်အရွယ် မိုးမိုးနွယ်နဲ့ပြားချောင်းကြီးကျေးရွာမှ အသက်ခုနှစ်ဆယ်အရွယ် ဦးအောင်ကျော်တို့ နှစ်ဦးသေဆုံးခဲ့ပါတယ်။
အသက်ဆယ့်သုံးနှစ်အရွယ် မျိုးမြတ်ခိုင်နဲ့ အသက်သုံးဆယ်တနှစ်အရွယ် မျိုးဝေလင်းတို့အပါအဝင် အခြားထိခိုက်ဒဏ်ရာရရှိခဲ့ကြပေမယ့် အတည်မပြုနိုင်သေးပါဘူး။
အဲဒီရသေ့တောင်မြို့နယ်၊အငူမော်ကျေးရွာကိုလည်း ထပ်မံတိုက်ခိုက်ခဲ့တာကြောင့် အသက်နှစ်ဆယ့်လေးနှစ်အရွယ် ခင်မှုံယာဆွေ၊ အသက်လေးဆယ်ငါးနှစ်အရွယ် ဖြူသီးနဲ့ အသက်လေးဆယ်ငါးနှစ်အရွယ် သိန်းလှတို့ဒဏ်ရာရရှိခဲ့တာဖြစ်ပါတယ်။
အာဏာသိမ်းစစ်တပ်ဟာ မြေပြင်တိုက်ပွဲတွေမှာ အပြင်းအထန်စစ်ရှုံးနေတာကြောင့် အာရက္ခတပ်တော်ထိန်းချုပ်မြို့တွေကို ရည်ရွယ်ချက်ရှိရှိပစ်မှတ်ထားကာ စစ်ရာဇဝတ်မှုတွေဆက်တိုက် ကျူးလွန်နေတာဖြစ်ပါတယ်။
