Border News Agency
မြောက်ဦး၊ အောက်တိုဘာ ၁၀။
ဖက်ဒရယ်ဒီမိုကရေစီပြည်ထောင်စုပေါ်ထွန်းရေးဦးဆောင်ကောင်စီ (SCEF) နဲ့ ရက္ခိုင်အမျိုးသားအဖွဲ့ချုပ်/အာရက္ခတပ်တော် (ULA/AA) တို့အောက်တိုဘာလ ၈ ရက်နေ့မှာ အွန်လိုင်းကဒုတိယအကြိမ်တွေ့ဆုံဆွေးနွေးခဲ့ကြပါတယ်။
အဲဒီတွေ့ဆုံပွဲမှာ SCEF အလှည့်ကျ သဘာပတိခူဦးရယ်၊ ယာယီသမ္မတဒူဝါလရှီးလနဲ့ ဒေါက်တာညိုထွန်းအောင်ဦးဆောင်တဲ့ ထိပ်ပိုင်းခေါင်းဆောင်တွေ တက်ရောက်ခဲ့ကြတာပါ။
ဆွေးနွေးပွဲမှာ စက်တင်ဘာလ ၂၈ ရက်နေ့က ကျောက်တော်မြို့အနီး အာဏာသိမ်းစစ်တပ်ရဲ့ လေကြောင်းတိုက်ခိုက်မှုကြောင့် အရပ်သားငါးဆယ်သေဆုံးခဲ့ရတဲ့ ဖြစ်စဉ်အပေါ် SCEF က ဝမ်းနည်းကြောင်းပြောခဲ့ပြီး ကန့်ကွက်ရှုတ်ချကြောင်းထုတ်ပြန်သွားမယ်လို့ဆိုပါတယ်။
အဲဒီအပြင် လက်ရှိမြန်မာနိုင်ငံရဲ့ နိုင်ငံရေး၊ စစ်ရေးအခြေအနေတွေ၊ အာရက္ခဒေသအတွင်း အာဏာသိမ်းစစ်တပ်ရဲ့ ထိုးစစ်အခြေအနေတွေနဲ့ လူသားချင်းစာနာမှုဆိုင်ရာ အကူအညီလိုအပ်ချက်တွေကိုလည်းဆွေးနွေးခဲ့ကြတာပါ။
SCEF နဲ့ ULA/AA တို့ဟာ ပြီးခဲ့တဲ့ ဇူလိုင်လ ၂၃ ရက်နေ့က ပထမအကြိမ်အွန်လိုင်းကနေ တွေ့ဆုံဆွေးနွေးခဲ့ကြတာဖြစ်ပါတယ်။
