Border News Agency
ကျိုက်ထို၊ အောက်တိုဘာလ ၁၃။
မွန်ပြည်၊ကျိုက်ထိုမြို့နယ်မှာ အာဏာသိမ်းစစ်တပ်လေကြောင်းတိုက်ခိုက်လို့ နေအိမ်နဲ့ ရေသန့်စက်ရုံပျက်စီးသွားတယ်လို့ ကရင်အမျိုးသားအစည်းအရုံးမှ အောက်တိုဘာလ ၁၃ ရက်နေ့ ထုတ်ပြန်ပါတယ်။
ကျိုက်ထိုမြို့နယ်၊ငှက်ပျောတောကျေးရွာအုပ်စု၊ ဇီးကုန်းရွာကို အောက်တိုဘာလ ၉ ရက်၊နေ့လည် ၂နာရီ နဲ့ ညနေ ၅ နာရီမှာ စစ်တပ်အမှတ် ၄၄ ခြေမြန်တပ်မဌာနချုပ်မှ ဒရုန်းနှစ်စင်းနဲ့ဗုံးသီလေးလုံးကြဲချတိုက်ခိုက်ခဲ့တာလို့ ဆိုပါတယ်။
အဲဒီအပြင် ဝေါ်ကလော် (ဝင်းကလော) ကျေးရွာအုပ်စု၊ စူနေးခီး (ဆောင်နိုင်ကြီး) ရွာအနီးရှိ ရေသန့်စက်ရုံကိုလည်း အောက်တိုဘာလ ၂ ရက်၊ ည ၈ နာရီကျော်အချိန့်က စစ်တပ်ရဲ့အမှတ် ၄၄ ခြေမြန်တပ်မဌာနချုပ်လက်အောက်ခံ ခမရ ၂၀၇ တပ်ရင်းမှ အသေခံဒရုန်းနဲ့ထပ်မံတိုက်ခိုက်ခဲ့တယ်လို့ ဆိုပါတယ်။
အဲဒီလေကြောင်းတိုက်ခိုက်မှုအတွင်း ဇီးကုန်းရွာမှ ဦးစိုးပေရဲ့နေအိမ် ထိမှန်ပျက်စီးခဲ့ပြီး စူနေးခီးရွာအနီးရှိ စက်ရုံအဆောက်အအုံထိခိုက်ပျက်စီးခဲ့တယ်လို့ ဆိုပါတယ်။
