Border News Agency
နေပြည်တော်၊ အောက်တိုဘာ ၂၉။
နိုင်ငံ့သမိုင်းမှာမှတ်ကျောက်တင်ခံနိုင်တဲ့ အစိုးရတရပ်ဖြစ်စေရေးအတွက် တိုင်းပြည်သာယာဝပြောရေး၊ ပြည်သူတွေရဲ့ လူမှုစီးပွားဘဝ မြှင့်တင်ရေးနဲ့ ပညာတတ်လူသားအရင်းအမြစ် ဖွံ့ဖြိုးတိုးတက်ရေးတို့ကို အရှိန်အဟုန်နဲ့ဆောင်ရွက်ကြဖို့ အာဏာသိမ်းစစ်ခေါင်းဆောင် မင်းအောင်လှိုင်ကပြောပါတယ်။
နေပြည်တော်မှာကျင်းပခဲ့တဲ့ ပြည်ထောင်စုအစိုးရအဖွဲ့အစည်းအဝေးမှာ စစ်ခေါင်းဆောင်မင်းအောင်လှိုင်က ခုလိုပြောကြားခဲ့တာပါ။
စိုက်ပျိုးမွေးမြူရေးလုပ်ငန်းတွေမှာ ခေတ်မီနည်းပညာတွေအသုံးချကာ ပြည်တွင်းစားသုံးမှုဖူလုံရေးနဲ့ ပို့ကုန် ဈေးကွက်ချဲ့ထွင်ရေးဆောင်ရွက်ကြဖို့လည်း ဆိုပါတယ်။
အဲဒီအပြင် လက်ရှိ ဖြစ်ပေါ်နေတဲ့ ကုန်ဈေးနှုန်းကြီးမြင့်မှု၊ စက်သုံးဆီနဲ့ စားသုံးဆီ တင်သွင်းနေရမှု၊ ငွေကြေးတန်ဖိုး မတည်ငြိမ်မှုတွေကို ဖြေရှင်းဖို့ တိုက်တွန်းခဲ့သလို KG+9 မသင်မနေရ ပညာရေးစနစ်နဲ့ ပညာရေး ကွာဟချက်တွေ လျှော့ချရေး၊ နယ်စပ် တရားမဝင်ကုန်သွယ်မှုတွေကို တားဆီးကြဖို့လည်း ပြောခဲ့ပါတယ်။
ဒါပေမယ့်အာဏာသိမ်းစစ်တပ်ရဲ့ လေကြောင်း တိုက်ခိုက်မှုတွေနဲ့ တိုက်ပွဲတွေကြောင့် စာသင်ကျောင်း အများအပြား ပိတ်ထားရပြီး ပညာရေးယန္တရားမှာ လုံးဝနီးပါးပျက်စီးနေသလို ကုန်ဈေးနှုန်းနဲ့ စက်သုံးဆီ ဈေးနှုန်းတွေမှာလည်း အဆမတန်စံချိန်တင်မြင့်တက်နေတာဖြစ်ပါတယ်။
အဲဒီအပြင် အာဏာသိမ်းစစ်တပ်ရဲ့ နယ်မြေ ထိန်းချုပ်နိုင်မှု လျော့ကျလာတာနဲ့အမျှ နယ်စပ် ကုန်သွယ်ရေးလမ်းကြောင်း အများစုဟာ တော်လှန်ရေးတပ်ဖွဲ့တွေရဲ့ ထိန်းချုပ်မှုအောက်ရောက်ရှိနေပြီး စီးပွားရေးနဲ့ အုပ်ချုပ်ရေးယန္တရားတွေလည်း ကမောက်ကမဖြစ်နေဆဲဖြစ်ပါတယ်။
