Border News Agency
ကျောက်တော်၊ ဇူလိုင် ၂၁။

အာရက္ခဒေသ မြို့နယ်တွေမှာ တစ်ပတ်ရစ်ဆိုင်ကယ် ရောင်းဝယ်မှုလုပ်ငန်းတွေ အရင်ကထက် ပိုမိုတွင်ကျယ်လာနေတယ်လို့ ဒေသခံတွေက BNA ကိုပြောပါတယ်။

ရခိုင်မှာ စစ်ပွဲတွေ စတင်ခဲ့တဲ့ ၂၀၂၃ နိုဝင်ဘာလကတည်းက စစ်ကောင်စီက ကုန်းလမ်းနဲ့ ရေလမ်း အားလုံးကို ပိတ်ဆို့ဖြတ်တောက်ထားတာပါ။ လက်ရှိမှာ ပြည်မကနေ ဆိုင်ကယ်အသစ်တွေ မတင်သွင်းနိုင်တော့ဘဲ အသစ်တစ်စီးဝယ်စီးဖို့တောင် ဈေးအဆမတန်မြင့်တက်နေတာတွေနဲ့ ကြုံတွေ့နေကြရတာလည်းဖြစ်ပါတယ်။ ဒါကြောင့် ဆိုင်ကယ်အရောင်းဆိုင်ပိုင်ရှင်တွေဟာ အာရက္ခတပ်တော် (AA) ထိန်းချုပ်ရာမြို့နယ်တွေမှာ ဆိုင်ကယ်အဟောင်းတွေကို လိုက်လံဝယ်ယူပြီး ပြုပြင်ရောင်းချလာကြတာလို့ ဆိုကြပါတယ်။

လက်ရှိမှာ ဆိုင်ကယ်တွေကို တပိုင်တနိုင်ကုန်တင်ကူးသန်းသွားလာဖို့၊ ခရီးသွားလာဖို့နဲ့ ကယ်ရီဆွဲဖို့ အတွက် ဝယ်ယူအသုံးပြုသူများနေတာကြောင့် အဟောင်းပြုပြင် ရောင်းချမှုလုပ်ငန်း ကျယ်ပြန့် လာနေတာလို့ ဆိုကြပါတယ်။

“အသစ်ကဝယ်မစီးနိုင်ကြတော့ဘူး။ စီးနိုင်လည်း ပစ္စည်းကမရှိဘူး။ ခုက တပတ်နွမ်းဆိုင်ကယ်တွေကိုပဲ အသုံးများလာတယ်။ အသစ်ဆိုရင် ခရီးသွားပြီး ပစ္စည်းတွေတင်ဖို့ ချဖို့ နှမြောကြတယ်။ တပတ်နွမ်း ဆိုတော့ နေရာတိုင်းသုံးလို့အဆင်ပြေတယ်။ ရောင်းလည်းရောင်းရပါတယ်။ အရောင်းဆိုင်တွေလည်း များလာတယ်။ လုပ်ငန်းက ကျယ်ပြန့်လာနေတာ မြို့တိုင်းလိုလိုပါပဲ” လို့ ကျောက်တော်မြို့နယ်က တပတ်နွမ်းဆိုင်ကယ်အရောင်းဆိုင်ပိုင်ရှင်တစ်ဦးက BNA ကို ပြောပါတယ်။

စက်သုံးဆီဈေး အဆမတန်မြင့်တက်လို့ ခရီးသွားလာရာမှာ လမ်းစရိတ်တွေလည်း ကုန်ကျစရိတ်ပိုများ လာတဲ့အတွက် တပတ်ရစ်ဆိုင်ကယ်တွေကို ဝယ်ယူသူ ပိုများပြားနေတယ်လို့လည်း သူကပြောပါတယ်။

တပတ်ရစ်ဆိုင်ကယ်တွေရဲ့ လက်ရှိကာလပေါက်ဈေးဟာ ဆိုင်ကယ်အမျိုးအစားအပြင် ပစ္စည်း အခြေအနေပေါ်မူတည်ပြီး အနိမ့်ဆုံးဈေး ဆယ့်ငါးသိန်းကျပ်ကနေ အမြင့်ဆုံးဈေး ကျပ်သိန်းငါးဆယ် ကျော်အတွင်း ရှိနေတယ်လို့လည်း အရောင်းဆိုင်ပိုင်ရှင်တွေကပြောပါတယ်။

“စစ်ဘေးရှောင်တွေက ပိုရောင်းကြတယ်။ စားဝတ်နေရေးခက်ခဲနေကြတော့ ဆိုင်ကယ်တွေ ရောင်းကြ တယ်။ တစ်ချို့ စစ်ဘေးရှောင်တွေဆို အိမ်ကပါလာတာကို ရောင်းပြီး တစ်ပိုင်တစ်နိုင် ခရီးသွားလုပ် စားဖို့ ကယ်ရီဆွဲဖို့နဲ့ ဟိုသွား ဒီသွားသုံးဖို့ တပတ်နွမ်းထဲက ဈေးသက်သာတာတွေကို ဝယ်ကြတာတွေရှိတယ်။ ရခိုင်မှာ တပတ်နွမ်းဆိုင်ကယ်လုပ်ငန်းက အရင်ကထက်ပိုကျယ်ပြန့်နေပြီ” လို့ ကျောက်တော် မြို့နယ်က ဆိုင်ကယ်အရောင်းဆိုင်ပိုင်ရှင်က ဆက်ပြောပါတယ်။

တပတ်ရစ် ဆိုင်ကယ်စျေးကွက်ထဲမှာ ဆီစားသက်သာတဲ့ Smash နဲ့ Wave100 အမှတ်တံဆိပ် ဆိုင်ကယ်အမျိုးအစားကိုသာ ဝယ်ယူသူပိုများပြီး ရောင်းအားလည်း ပိုကောင်းတယ်လို့ ဆိုကြပါတယ်။