Border News Agency
အမေရိကန်၊ ဖေဖော်ဝါရီ ၁၁။
ကျူးဘားအစိုးရဟာ နိုင်ငံအတွင်းရှိအပြည်ပြည်ဆိုင်ရာလေဆိပ်အားလုံးမှာ လေယာဉ်ဆီ (Jet A-1) ပြတ်လပ်နေတာကြောင့် နိုင်ငံတကာလေကြောင်းလိုင်းတွေကို ဆီဖြည့်ပေးနိုင်တော့မှာမဟုတ်ဘူးလို့ ဖေဖော်ဝါရီ ၈ ရက်နေ့မှာ တရားဝင်သတိပေးချက် ထုတ်ပြန်လိုက်ပါတယ်။
အဲဒီအခြေအနေဟာ အမေရိကန်သမ္မတ ဒေါ်နယ်ထရန့်က ကျူးဘားအပေါ် စွမ်းအင်ပိတ်ဆို့မှုအသစ်တွေ လုပ်ဆောင်လိုက်တာကြောင့် ဖြစ်ပေါ်လာတာဖြစ်ပြီး၊ ဆီပြတ်လပ်မှုဟာ အနည်းဆုံးတလကြာမြင့်မယ်လို့ သိရပါတယ်။
သမ္မတထရန့်ဟာ ကျူးဘားကိုဆီရောင်းပေးတဲ့ ဘယ်နိုင်ငံကိုမဆို အမေရိကန်ကိုကုန်ပစ္စည်းတင်သွင်းရင် အထူးအခွန်အကြီးအကျယ်ကောက်မယ်လို့ ခြိမ်းခြောက်ခဲ့တာကြောင့် အဓိကဆီပေးသွင်းနေတဲ့ မက္ကဆီကိုနဲ့ ဗင်နီဇွဲလားတို့က ဆီတင်ပို့မှုတွေ ရပ်တန့်သွားခဲ့ပါတယ်။
ဒီလိုဆီပြတ်လပ်မှုကြောင့် ကျူးဘားကိုပျံသန်းနေတဲ့ ခရီးစဉ်တွေရပ်နားလိုက်ရသလို ဆိုက်ရောက်နေတဲ့ ခရီးသည် ၃,၀၀၀ ကျော်ကို ပြန်ခေါ်ဖို့အတွက် ဆီအပိုတင်ဆောင်ထားတဲ့ အထူးလေယာဉ်တွေကိုပဲ စေလွှတ်နေရပါတယ်။
နိုင်ငံတကာလေကြောင်းလိုင်းအချို့ဟာ ကျူးဘားခရီးစဉ်တွေကိုဖျက်သိမ်းတာ ဒါမှမဟုတ် အနီးနားက ဘဟားမားနဲ့ မက္ကဆီကိုနိုင်ငံတွေမှာ ဆီဝင်ဖြည့်ပြီးမှ ပျံသန်းရမယ့်အခြေအနေတွေနဲ့ ရင်ဆိုင်နေရပါတယ်။
လက်ရှိမှာ လေယာဉ်ဆီတင်မကဘဲ ပြည်တွင်းမှာလည်း လျှပ်စစ်မီး ၁၀ နာရီကျော် ပြတ်တောက်တာ၊ ဘတ်စ်ကားနဲ့ ရထားခရီးစဉ်တွေ လျှော့ချတာအပြင် ဟိုတယ်အချို့ကိုပိတ်သိမ်းပြီး စွမ်းအင်ချွေတာနေရတယ်လို့ သိရပါတယ်။
