​Border News Agency
မောင်တော၊ မတ် ၁၄။

​ရှမ်းပြည်နယ်မြောက်ပိုင်း၊ ကွတ်ခိုင်ခရိုင်အတွင်းဖြစ်ပွားခဲ့တဲ့ စစ်ရေးပဋိပက္ခတွေဟာ PSLF/TNLA အဖွဲ့ရဲ့လုပ်ဆောင်ချက်တွေကြောင့်ဖြစ်ပြီး အဲဒီအဖွဲ့မှာသာ တာဝန်ရှိတယ်လို့ MNDAA က မတ်လ ၁၄ ရက်၊ ဒီနေ့မှာ ထုတ်ပြန်ပါတယ်။

ပြီးခဲ့တဲ့ ဖေဖော်ဝါရီလ ၁၃ ရက်နေ့ကကွတ်ခိုင်ခရိုင်အတွင်းရှိ MNDAA အုပ်ချုပ်ရေးဌာနတွေကို TNLA ဘက်က ဝင်ရောက်တိုက်ခိုက်ခဲ့တာကြောင့် နှစ်ဖက်တင်းမာမှုတွေစတင်ခဲ့တာဖြစ်တယ်လို့ဆိုပါတယ်။

​အဲဒီပဋိပက္ခတွေကို ငြိမ်းချမ်းစွာဖြေရှင်းနိုင်ဖို့ MNDAA ဘက်ကညှိနှိုင်းစာ ၅ ကြိမ်တိုင်တိုင် ပေးပို့ခဲ့ပေမယ့် TNLA ဘက်က တစုံတရာ အကြောင်းပြန်တာမရှိဘဲ စစ်ရေးအရဆက်လက်လှုပ်ရှားနေတယ်လို့ ဆိုပါတယ်။

မတ်လ ၁၄ ရက်၊ဒီနေ့မနက်ပိုင်းမှာလည်း ကွတ်ခိုင်ဒေသအတွင်း ကင်းလှည့်နေတဲ့ MNDAA တပ်ဖွဲ့ဝင်တွေကို TNLA ဘက်က ကြားဖြတ်တိုက်ခိုက်ခဲ့တာကြောင့် နှစ်ဖက်တိုက်ပွဲတွေထပ်မံဖြစ်ပွားခဲ့ရတယ်လို့ ဆိုပါတယ်။

TNLA အနေနဲ့ ကွတ်ခိုင်ဒေသအတွင်း နယ်မြေချဲ့ထွင်ဖို့ ကြိုးပမ်းနေတာတွေ၊ အဓမ္မစစ်သားစုဆောင်းတာတွေနဲ့ မဟာမိတ်အချင်းချင်း သွေးကွဲစေမယ့်လုပ်ရပ်တွေကို လုပ်ဆောင်နေတယ်လို့ စွပ်စွဲထားပါတယ်။

အခုလို ဖြစ်ပေါ်လာတဲ့ ပြဿနာအားလုံးအတွက် TNLA ဘက်ကသာ တာဝန်ယူရမှာဖြစ်ပြီး နောက်နောင်မှာလည်း မိမိကိုယ်ကိုယ်ကာကွယ်တဲ့အနေနဲ့ တန်ပြန်တိုက်ခိုက်မှုတွေ လုပ်ဆောင်သွားမယ်လို့ MNDAAကဆိုပါတယ်။