Border News Agency
ထားလဲ၊ မတ် ၂၁။
ကရင်နီပြည်၊ ထားလဲ-နန်းဖဲ လမ်းမကြီးပေါ်မှာ လမ်းလုံခြုံရေးယူနေတဲ့ စစ်ကော်မရှင်တပ်ဖွဲ့ဝင်တွေကို ကရင်နီတော်လှန်ရေးတပ်ဖွဲ့တွေက ကြားဖြတ်တိုက်ခိုက်ခဲ့ရာမှာ ၇ ဦးသေဆုံးပြီး အများအပြားဒဏ်ရာရသွားခဲ့တယ်လို့ ကရင်နီအမျိုးသားများကာကွယ်ရေးတပ် (KNDF) က မတ်လ ၂၀ ရက်၊မနေ့ကထုတ်ပြန်ပါတယ်။
အဲဒီထားလဲ-နန်းဖဲ လမ်းမကြီးပေါ်မှာ လမ်းလုံခြုံရေးယူနေတဲ့ စစ်ကော်မရှင်တပ်ဖွဲ့ဝင်တွေကို မတ်လ ၁၇ ရက်နေ့မှာ တော်လှန်ရေးတပ်ဖွဲ့တွေက လိုက်လံချေမှုန်းခဲ့တာကြောင့်ဆုတ်ခွာထွက်ပြေးသွားကြတယ်လို့ဆိုပါတယ်။
အဲဒီတိုက်ပွဲအပြီးမှာတော့ သူတို့ဆီကနေ လက်နက် ၅ လက်နဲ့ ခဲယမ်းမီးကျောက်တွေကို သိမ်းဆည်းရရှိခဲ့တယ်လို့ဆိုပါတယ်။
အဲဒီအပြင် ပြီးခဲ့တဲ့ ဖေဖော်ဝါရီလ ၂၇ ရက်နေ့ကလည်း နန်းဖဲကျေးရွာအနီးမှာ စစ်ကော်မရှင်စစ်ကြောင်းကို တိုက်ခိုက်ခဲ့ရာမှာ ထိခိုက်သေဆုံးမှုတွေရှိခဲ့ပြီး လက်နက်ငယ် ၁ လက် သိမ်းဆည်းရမိခဲ့တယ်လို့ဆိုပါတယ်။
စစ်ကော်မရှင်ဟာ ရှမ်းပြည်နယ်တောင်ပိုင်းကနေ ရန်နိုင်မင်းစစ်ဆင်ရေးနဲ့ စစ်ကြောင်းထိုးနေတာ ဖြစ်ပါတယ်။
စစ်ကော်မရှင်ဘက်ကတော့ ဖရူဆို-ဘောလခဲ-ဖားဆောင်း လမ်းကြောင်းတလျှောက် မြို့တွေကို ထိန်းချုပ်နိုင်ပြီလို့ ကြွေးကြော်နေပေမယ့် မြေပြင်မှာတော့ စစ်ကြောင်းတွေ ချေမှုန်းခံရတာ၊ယာဉ်တန်းတွေ တိုက်ခိုက်ခံရတာတွေနဲ့ ကြုံတွေ့နေရပြီး အကျအဆုံး များပြားနေတာပါ။
မြေပြင်တိုက်ပွဲတွေမှာ အကျအဆုံးများနေတဲ့ စစ်ကော်မရှင်ဟာ အရပ်သားပြည်သူတွေရှိတဲ့နေရာတွေကို လေကြောင်းကနေ ပစ်မှတ်ထား တိုက်ခိုက်နေတာကြောင့် ပြည်သူတွေအနေနဲ့ လေကြောင်းရန်ကို အထူးသတိပြုကြဖို့ KNDF က တိုက်တွန်းထားပါတယ်။
