Border News Agency
တဟီရန်၊ဧပြီ ၁၅။
ဒေါ်နယ်ထရမ့်အစိုးရဟာ အီရန်ကို သူတို့အလိုကျစစ်ပွဲရပ်စဲရေး သဘောတူညီချက်တွေလက်ခံလာအောင် ဖိအားပေးတဲ့အနေနဲ့ အီရန်ဆိပ်ကမ်းတွေကို အမေရိကန်ရေတပ်ကနေ စတင်ပိတ်ဆို့လိုက်ပြီဖြစ်ပါတယ်။
အီရန်ဘက်ကတော့ ဒါဟာတရားမဝင်တဲ့ ပင်လယ်ဓားပြလုပ်ရပ်လို့ တုံ့ပြန်ထားပါတယ်။
စစ်ပွဲစတင်ခဲ့တဲ့ ဖေဖော်ဝါရီလကတည်းက အီရန်ဟာ ဟော်မုဇ်ရေလက်ကြားကို ပိတ်ထားခဲ့ပေမယ့် ကိုယ်တိုင်ကတော့ရေနံတွေကို ဆက်ပြီးတင်ပို့နေခဲ့တာပါ။
ပြီးခဲ့တဲ့တလအတွင်းမှာတင် အီရန်ဟာ ရေနံတင်ပို့မှုကနေ အမေရိကန်ဒေါ်လာ ၅ ဘီလီယံနီးပါး (စစ်မဖြစ်ခင်ထက် ၄၀ ရာခိုင်နှုန်းပိုများတဲ့ပမာဏ) ဝင်ငွေရရှိခဲ့ပါတယ်။
အခုအမေရိကန်ရဲ့ ပိတ်ဆို့မှုကြောင့် အီရန်ရဲ့အဓိကဝင်ငွေဖြစ်တဲ့ ရေနံတင်ပို့မှုဟာ တိုက်ရိုက်ထိခိုက်တော့မှာဖြစ်ပါတယ်။
အဲဒီပင်လယ်ပြင်မှာရှိနေတဲ့ အီရန်ရေနံတင်သင်္ဘောတွေရဲ့ ၉၇ ရာခိုင်နှုန်းကျော်ဟာ တရုတ်နိုင်ငံကိုဦးတည်နေတာဖြစ်လို့ ဒီပိတ်ဆို့မှုက တရုတ်နဲ့ပါ ထိပ်တိုက်တွေ့နိုင်တဲ့အနေအထားပါ။
ရေနံတင်မကဘဲ တရုတ်၊ အိန္ဒိယတို့နဲ့ကုန်သွယ်နေတဲ့ စိုက်ပျိုးရေးနဲ့စက်မှုကုန်ပစ္စည်းတွေလည်း ထိခိုက်လာနိုင်တဲ့အတွက် အီရန်ပြည်တွင်းမှာ ကုန်စည်ပြတ်လပ်မှုတွေနဲ့ စီးပွားရေးအကျပ်အတည်း ပိုဆိုးလာနိုင်တယ်လို့ ပညာရှင်တွေကသုံးသပ်ထားပါတယ်။
အီရန်အတွက် ထွက်ပေါက်အနေနဲ့ တရုတ်-အီရန်ရထားလမ်းပိုင်းရှိနေပေမယ့် ရေနံနဲ့စက်မှုကုန်ကြမ်းတွေကို ရထားနဲ့သယ်ယူဖို့က လက်တွေ့မှာ အခက်အခဲအများကြီးရှိနေပါတယ်။
အဲဒါကြောင့် အခုပိတ်ဆို့မှုဟာ အီရန်ကိုအရှုံးပေးလာအောင် လုပ်နိုင်မလား၊ဒါမှမဟုတ် စစ်ပွဲကို ပိုပြီးပြင်းထန်လာစေမလားဆိုတာကတော့ အမေရိကန်ရေတပ်က အီရန်သင်္ဘောတွေကို တကယ်ဖမ်းဆီး၊ တိုက်ခိုက်မလားဆိုတဲ့အပေါ်မှာ မူတည်နေပါတယ်။
