Border News Agency
ဘီးလင်း၊ဧပြီ ၁၅။
ဒူးသထူခရိုင်၊ ဘီးလင်းမြို့နယ်အတွင်းမှာ စစ်ကော်မရှင်တပ် လေကြောင်းတိုက်ခိုက်လို့ အရပ်သား ၇ ဦး ဒဏ်ရာရပြီးနေအိမ်တွေနဲ့စက်သုံးဆီဆိုင်တဆိုင် မီးလောင်ပျက်စီးခဲ့တယ်လို့ KNU ဗဟိုက ဧပြီလ ၁၄ ရက်၊ မနေ့ကထုတ်ပြန်ပါတယ်။
အဲဒီဘီလင်းမြို့နယ်ကို ဧပြီလ ၄ ရက်နေ့က ကျိုက်ထီးရိုးလေးစေတီတော်မုခ်ဦးကို လေကြောင်းတိုက်ခိုက်ခဲ့တာကြောင့် အနားယူနေတဲ့ ခရီးသွားပြည်သူ ၅ ဦး ဒဏ်ရာရခဲ့သလို ကား ၃ စီးနဲ့ ဘာသာရေးအဆောက်အအုံတချို့ ပျက်စီးခဲ့ရတယ်လို့ဆိုပါတယ်။
အဲဒီအပြင် ဧပြီလ ၉ ရက်နဲ့ ၁၀ ရက်နေ့တွေမှာလည်း ဘုန်းကြီးကျောင်းနဲ့ကျေးရွာတွေကို ပစ်မှတ်ထားပြီး ပေါင် ၃၀၀ ဗုံးတွေ၊ Y-12 လေယာဉ်တွေနဲ့ အကြိမ်ပေါင်းများစွာ ဗုံးကြဲခဲ့လို့ ကျောက်ဖျာရွာက အမျိုးသမီး ၂ ဦး ထပ်မံဒဏ်ရာရခဲ့ပြီး နေအိမ်တချို့နဲ့ ရော်ဘာခြံတွေ မီးလောင်ခဲ့တယ်လို့ဆိုပါတယ်။
နောက်ပြီး ဧပြီလ ၁၁ ရက်နေ့ကလည်း မြစ်ကျိုးရွာက စောထီးဒို့စက်သုံးဆီအရောင်းဆိုင်ကို လေကြောင်းတိုက်ခိုက်ခဲ့လို့ ဆိုင်တခုလုံး မီးလောင်ပျက်စီးသွားခဲ့တယ်လို့ဆိုပါတယ်။
အဲဒီအပြင် ဧပြီလ ၁၂ ရက်နေ့အထိ ဆက်တိုက်ဆိုသလို လုပ်ဆောင်ခဲ့တဲ့ ဒီလေကြောင်းတိုက်ခိုက်မှုတွေကြောင့် လေးကေရွာအပါအဝင် ရွာအမြောက်အမြားက နေအိမ်တွေမီးလောင်ပြာကျခဲ့ရတယ်လို့ ဆိုပါတယ်။
အဲဒီဘီးလင်းမြို့နယ်အတွင်းက အပြစ်မဲ့ပြည်သူတွေဟာ ဘေးလွတ်ရာကိုထွက်ပြေးတိမ်းရှောင်နေကြရပြီး အရေးပေါ်လူသားချင်းစာနာထောက်ထားမှု အကူအညီတွေလိုအပ်နေကြတယ်လို့ ဆိုပါတယ်။
