Border News Agency
မြောက်ဦး၊ မေ ၃၀။
အာရက္ခတပ်တော်(AA)ထိန်းချုပ်ထားတဲ့ ရှေးဟောင်းယဉ်ကျေးမှုနယ်မြေ မြောက်ဦးမြို့ကို သန့်ရှင်းသပ်ရပ်ပြီး ရေရှည်တည်တံ့ခိုင်မြဲအောင် ထိန်းသိမ်းစောင့်ရှောက်နိုင်ဖို့အတွက် မြောက်ဦးမြို့ပြတည်ဆောက်ရေးစီမံကိန်း အကောင်အထည်ဖော်ဆောင်ရွက်နေတယ်လို့ မတ်လ ၂၉ ရက်၊ မနေ့က ရက္ခိုင့်အမျိုးသားအဖွဲ့ချုပ်က ထုတ်ပြန်ပါတယ်။
အာဏာရှင်အဆက်ဆက်က စနစ်တကျမရှိခဲ့တဲ့ မြို့ပြဖွံ့ဖြိုးတိုးတက်ရေးကို ပြန်လည်ပြုပြင်ဖို့၊ လူဦးရေတိုးပွားလာမှုနဲ့ မြို့ပြချဲ့ထွင်မှုတွေကို စနစ်တကျစီမံခန့်ခွဲဖို့၊ လမ်းတွေနဲ့ မြို့ပြတည်ဆောက်ရေးလုပ်ငန်းတွေကို ဥပဒေနဲ့အညီထိန်းသိမ်းနိုင်ဖို့အတွက် မြို့ပြစီမံကိန်းလုပ်ငန်းကော်မတီတွေကိုဖွဲ့စည်းပြီး အားသွန်ခွန်စိုက်ဆောင်ရွက်နေတယ်လို့ ဆိုပါတယ်။
အာရက္ခပြည်သူ့တော်လှန်ရေးအစိုးရဟာ စစ်ရေးအပြင်တရားဥပဒေစိုးမိုးရေး၊ ကျန်းမာရေး၊ ပညာရေး၊ အုပ်ချုပ်ရေးနဲ့ မြို့ပြ/ကျေးလက်ဖွံ့ဖြိုးတိုးတက်ရေးလုပ်ငန်းတွေကို ပြည်သူတွေနဲ့အတူလုပ်ဆောင်နေတယ်လို့လည်း ဆိုပါတယ်။
အဲဒီမြို့ပြစီမံကိန်းလုပ်ငန်းကော်မတီတွေဟာ ဒေသအသီးသီးကမြို့ပြနေရာတွေကို ကွင်းဆင်းတိုင်းတာတာ၊ သက်ဆိုင်သူတွေနဲ့ဆွေးနွေးညှိနှိုင်းတာ၊ ပိုင်ဆိုင်မှုတွေကိုအတည်ပြုပြီး နယ်နိမိတ်သတ်မှတ်တာတွေအပြင် လိုအပ်ချက်အရ ဥပဒေလုပ်ထုံးလုပ်နည်းတွေနဲ့အညီ မြေသိမ်းဆည်းတာနဲ့လျော်ကြေးပေးတာတွေကို အဆင့်ဆင့်စနစ်တကျလုပ်ဆောင်သွားမယ်လို့ ဆိုပါတယ်။
ဒါကြောင့်ပြည်သူတွေဟာ အာရက္ခတပြည်လုံးတည်ဆောက်ရေးလုပ်ငန်းတွေ အရှိန်အဟုန်နဲ့အောင်မြင်နိုင်ဖို့အတွက် အမျိုးသားရေးသတိ၊တိုင်းချစ်ပြည်ချစ်စိတ်တွေနဲ့အတူ အရင်ကထက်ပိုတဲ့ ပူးပေါင်းပါဝင်မှု၊ အင်တိုက်အားတိုက် ကူညီလုပ်ဆောင်မှုတွေနဲ့ ဝိုင်းဝန်းလုပ်ဆောင်ပေးကြဖို့ ULAက တိုက်တွန်းနှိုးဆော်ထားပါတယ်။
အဲဒီမြောက်ဦး – မင်းပြားကားလမ်းဘေး ပေါင်းတုတ်ကျေးရွာအနီးရှိ လယ်ယာမြေတွေကို မြို့ပြစီမံကိန်းတည်ဆောက်ရေးအတွက် သိမ်းသွားမယ်လို့ အာရက္ခပြည်သူ့တော်လှန်ရေးအစိုးရ ထုတ်ပြန်ထားပါတယ်။
အဲဒီမြေပိုင်ရှင်အများစုကတော့ တဧကကိုသိန်းရှစ်ဆယ်သာလျော်ကြေးပေးတာမို့ သဘောမတူကြပေမယ့် အာရက္ခပြည်သူ့တော်လှန်ရေးအစိုးရက အတင်းအဓမ္မမဖြစ်မနေသိမ်းယူသွားမယ့်သဘောရှိနေတယ်လို့ ဒေသခံပြည်သူတွေကဆိုကြပါတယ်။
