Border News Agency
ဘန်ကောက်၊ ဧပြီ ၁၈။
ထိုင်းနိုင်ငံမှာ မီလီယွိုက်ဒိုးဆစ်လို့ခေါ်တဲ့ မြေဆီလွှာကတဆင့် ကူးစက်တတ်တဲ့ ရောဂါကြောင့် အခုနှစ်အတွင်း လူ ၂၃ ဦး သေဆုံးခဲ့ပြီး ရောဂါကူးစက်ခံရသူ ၇၀၀ ကျော် ရှိလာတယ်လို့ ထိုင်းအစိုးရက ဧပြိီလ ၁၈ ရက်၊ဒီနေ့ထုတ်ပြန်ပါတယ်။
အဲဒီရောဂါဟာ မြေကြီးနဲ့ ရေထဲမှာရှိတဲ့ ဘက်တီးရီးယားပိုးကြောင့် ဖြစ်ပွားတာဖြစ်ပြီး အရေပြားက အနာတွေကတဆင့် ထိတွေ့မိတာ ဒါမှမဟုတ် ဖုန်မှုန့်နဲ့ ရေမှုန်တွေကို ရှူမိရာကနေ ကူးစက်နိုင်တာပါ။
အဓိကအားဖြင့် အဖျားတက်တာ၊ ခေါင်းကိုက်တာနဲ့ ကြွက်သားနာကျင်တာတွေ ခံစားရတတ်ပြီး အသက် ၅၀ ကျော်အရွယ်တွေနဲ့ ဆီးချို၊ ကျောက်ကပ်ရောဂါအခံ ရှိသူတွေမှာ ပိုပြီး အန္တရာယ်ရှိတယ်လို့ သိရပါတယ်။
အဲဒီရောဂါအတွက်ကာကွယ်ဆေးမရှိသေးတာကြောင့် မြေကြီးနဲ့ရေကိုတိုက်ရိုက်ထိတွေ့တာမျိုး ရှောင်ကြဉ်ကြဖို့နဲ့ မဖြစ်မနေထိတွေ့ရမယ်ဆိုရင် လည်ရှည်ဖိနပ်နဲ့ လက်အိတ်တွေ ဝတ်ဆင်ကြဖို့ အစိုးရက တိုက်တွန်းထားပါတယ်။
အဲဒီအပြင် အဖျား ၂ ရက်ထက်ပိုပြီး ရှိနေရင် ဆေးရုံ၊ ဆေးခန်းကို အမြန်ဆုံး သွားပြကြဖို့လည်း သတိပေးထားပါတယ်။
