Border News Agency
ကျောက်တော်၊ ဩဂုတ် ၂၆။
အာရက္ခပြည်သူ့တော်လှန်ရေးအစိုးရရဲ့ အာရက္ခပြည်သူ့ကျန်းမာရေးဌာနအောက်ရှိ အာရက္ခဆေးတက္ကသိုလ်မှာ ၂၀၂၆ -၂၀၂၇ ပညာသင်နှစ်အတွက် ဝင်ခွင့်လျှောက်လွှာတွေ စတင်ခေါ်ယူနေပါတယ်။
အဲဒီသင်တန်းကို အသက်နှစ်ဆယ့်ငါးနှစ်အောက် အာရက္ခပြည်တွင်းနဲ့ ပြင်ပရှိအာရက္ခပြည်သူတွေလျှောက်ထားနိုင်ပြီး တက္ကသိုလ်ဝင်တန်းစနစ်ဟောင်း၊စနစ်သစ်၊အာရက္ခအမျိုးသားပညာရေးဌာနဆယ့်နှစ်တန်း၊BECA၊ GED သို့မဟုတ် IGCSE အောင်မြင်ထားသူတွေဟာ သတ်မှတ်ချက်တွေနဲ့အညီ လျှောက်ထားနိုင်တာပါ။
အဲဒီလျှောက်လွှာနဲ့အတူ နိုင်ငံသားမှတ်ပုံတင်မူတူ၊ဓာတ်ပုံနှစ်ပုံ၊ပညာအရည်အချင်းအထောက်အထား မှတ်ပုံတင် သို့မဟုတ် အမှတ်စာရင်းနဲ့အာရက္ခနိုင်ငံသားကောင်းဖြစ်ကြောင်း ကျင့်ဝတ်နဲ့ဓလေ့ထုံးတမ်းဆိုင်ရာ ရပ်ကွက်၊ကျေးရွာအုပ်ချုပ်ရေးမှူးရဲ့ ထောက်ခံစာကို ပူးတွဲတင်ပြရမှာဖြစ်ပါတယ်။
အဲဒီလျှောက်လွှာကို လာမယ့်စက်တင်ဘာလ ၁၄ ရက်နေ့မှ အောက်တိုဘာလ ၅ ရက်နေ့အတွင်း သက်ဆိုင်ရာမြို့နယ် ပြည်သူ့ကျန်းမာရေးဌာနတွေကို ပေးပို့လျှောက်ထားရမှာဖြစ်ပါတယ်။
အဲဒီဝင်ခွင့်ရေးဖြေစာမေးပွဲကိုတော့ လာမယ့်နိုဝင်ဘာလ ၁၂ ရက်နေ့မှာ ကျင်းပသွားမှာဖြစ်ပြီး အင်္ဂလိပ်စာအရည်အသွေးစစ်ဆေးတာ(CEFR B1)နဲ့ အခြေခံဆေးပညာဘာသာရပ်တွေကို ဖြေဆိုရမှာပါ။
အဲဒီရေးဖြေစာမေးပွဲအောင်မြင်သူတွေကိုတော့ စိတ်ကျန်းမာရေးစိစစ်ခြင်းနဲ့ လူတွေ့စစ်ဆေးတာကို သီးသန့် အကြောင်းကြား ဆောင်ရွက်သွားမှာဖြစ်ပါတယ်။
နောက်ဆုံးအဆင့်ရွေးချယ်ခံရသူတွေဟာ နှစ်နှစ်ကြာဆေးပညာဘွဲ့သင်တန်းကို တက်ရောက်ရမှာဖြစ်ပြီး သင်တန်းပြီးရင် အာရက္ခပြည်သူ့ကျန်းမာရေးဌာနမှာ ဝန်ထမ်းအဖြစ်တာဝန်ထမ်းဆောင်ဖို့ ခံဝန်ကတိလက်မှတ်ရေးထိုးရမှာဖြစ်ပါတယ်။
အဲဒီကျောင်းဟာ အာရက္ခဒေသမှာကျန်းမာရေးစောင့်ရှောက်မှုတွေကို ပိုမိုဖြည့်ဆည်းပေးနိုင်ဖို့၊ဆေးပညာရှင်အရေအတွက်တိုးတက်လာစေဖို့နဲ့ ဒေသတည်ဆောက်ရေးမှာ လိုအပ်နေတဲ့ ဆေးဘက်ဆိုင်ရာ လူငယ်မျိုးဆက်သစ်တွေ မွေးထုတ်ပေးနိုင်ဖို့ ရည်ရွယ်ဖွင့်တာဖြစ်ပါတယ်။
