Border News Agency
ပဲခူး၊ ဩဂုတ် ၂၆။
ပဲခူးတိုင်း၊ ကရင်ပြည်နဲ့မွန်ပြည်တို့မှာရှိတဲ့ ရွှေကျင်မြစ်၊သံလွင်မြစ်နဲ့ ဘီးလင်းမြစ်တို့မှာ မြစ်ရေမြင့်တက်လာနေပြီး နောက်တရက်အတွင်း ရွှေကျင်၊ ဘားအံနဲ့ ဘီးလင်းမြို့တို့ရဲ့ စိုးရိမ်ရေမှတ်ကိုရောက်လာနိုင်တယ်လို့ မိုးလေဝသနဲ့ဇလဗေဒဦးစီးဌာနက သြဂုတ်လ ၂၆ ရက်၊ဒီနေ့သတိပေး ထုတ်ပြန်ပါတယ်။
အဲဒီမြို့နယ်တွေမှာ ဩဂုတ်လ ၂၆ ရက်၊ဒီနေ့မနက် ၆ နာရီထိ ရွှေကျင်မြစ်ရေဟာ စိုးရိမ်ရေမှတ်အောက် ၇ လက်မခန့်၊ သံလွင်မြစ်ရေဟာ ဘားအံမြို့မှာ စိုးရိမ်ရေမှတ်အောက် ၉ လက်မခန့်နဲ့ ဘီးလင်းမြစ်ရေဟာ ဘီးလင်းမြို့မှာ စိုးရိမ်ရေမှတ်အောက် ၁ ပေ ၃ လက်မခန့်အကွာကို ရောက်ရှိနေတာဖြစ်ပါတယ်။
အဲဒီမြစ်ရေတွေဟာလာမယ့်တရက်အတွင်း သက်ဆိုင်ရာမြို့တွေရဲ့ စိုးရိမ်ရေမှတ်တွေဆီ ရောက်ရှိမြင့်တက်လာနိုင်တယ်လို့ ခန့်မှန်းထားတာပါ။
အဲဒါကြောင့် ရွှေကျင်၊ဘားအံနဲ့ ဘီးလင်းမြို့နယ်အတွင်းမှာရှိတဲ့ မြစ်ကမ်းအနီးနဲ့ မြေနိမ့်ပိုင်းတွေမှာနေထိုင်ကြတဲ့ ပြည်သူတွေအနေနဲ့ မြစ်ရေအခြေအနေကို သတိပြုစောင့်ကြည့်ကြဖို့ မိုးဇလကအသိပေးထားပါတယ်။
အဲဒီအပြင်ရေကြီးရေလျှံမှုတွေဖြစ်လာရင် ဘေးလွတ်ရာကိုအချိန်မီရှောင်ရှားနိုင်ရေးအတွက်လည်း ကြိုတင်ပြင်ဆင်ထားကြဖို့ တိုက်တွန်းထားပါတယ်။
