Border News Agency
နေပြည်တော်၊ ဧပြီ ၂၁။
အစိုးရအဖွဲ့သစ်ရဲ့ရက်ပေါင်း ၁၀၀ ပြည့်မယ့် လာမယ့် ဇူလိုင်လ ၃၁ ရက်အတွင်းမှာ ငြိမ်းချမ်းရေးအတွက် PDF အဖွဲ့တွေ လာရောက်တွေ့ဆုံဆွေးနွေးကြဖို့ သမ္မတတု မင်းအောင်လှိုင်က ဧပြီလ ၂၀ ရက်၊မနေ့ကဖိတ်ခေါ်လိုက်ပါတယ်။
နေပြည်တော်မှာလုပ်တဲ့ အစိုးရအဖွဲ့အစည်းအဝေးမှာ သူကအခုလိုပြောခဲ့တာဖြစ်ပြီး လက်ရှိမှာလည်း အလင်းဝင်လာတဲ့ PDF တွေရှိနေသလို ထပ်ပြီးလာဖို့ တောင်းဆိုနေတာတွေလည်း ရှိတယ်လို့ ဆိုပါတယ်။
အဲဒီအစည်းအဝေးကို ဒုတိယသမ္မတတုတွေဖြစ်တဲ့ ဦးညိုစော၊ဒေါ်နန်းနီနီအေးနဲ့ အစိုးရအဖွဲ့ဝင် ဝန်ကြီးတွေ တက်ရောက်ခဲ့ကြပါတယ်။
ဒါပေမယ့် မြေပြင်မှာတော့ စစ်ကိုင်းနဲ့ မကွေးတိုင်းအပါအဝင် နေရာအတော်များများမှာ တိုက်ပွဲတွေ ဆက်ပြီးဖြစ်ပွားနေတာပါ။
အဲဒီလို ဖိတ်ခေါ်မှုတွေ ရှိနေပေမယ့် တိုက်ပွဲတွေကြားမှာ ဒေသခံတွေကတော့ နေရပ်စွန့်ခွာ ထွက်ပြေးနေရဆဲဖြစ်သလို လက်တွေ့မှာလည်း နှစ်ဖက်စစ်ရေး တင်းမာမှုတွေက လျော့ကျသွားတာမျိုး မရှိသေးဘူးလို့ တော်လှန်ရေးအသိုင်းအဝိုင်းကဆိုကြပါတယ်။
