Border News Agency
ကျောက်တော်၊ ဧပြီ ၂၈။
အာရက္ခပြည်သူ့ကျန်းမာရေးဌာနဟာ မိုးရာသီမှာ အများဆုံးဖြစ်ပွားလေ့ရှိတဲ့ သွေးလွန်တုတ်ကွေးရောဂါကို ပြည်သူတွေ သတိပြုကြိုတင်ကာကွယ်နိုင်ဖို့အတွက် ရောဂါလက္ခဏာတွေနဲ့ ကာကွယ်နည်းတွေကို ထုတ်ပြန်နှိုးဆော်လိုက်ပါတယ်။
အဲဒီရောဂါဟာ ဒန်ဂီးဗိုင်းရပ်စ်ပိုးကြောင့်ဖြစ်ပြီး ခြင်ကျားကိုက်ခံရမှုကနေတဆင့် ကူးစက်တာဖြစ်ပါတယ်။
သွေးလွန်တုတ်ကွေးရောဂါဟာ ကနဦးမှာ ရုတ်တရက် အဖျားတက်တာ၊ခေါင်းကိုက်တာ၊ကိုယ်လက်ကိုက်ခဲတာနဲ့အော့အန်တာစတဲ့လက္ခဏာတွေ ပြသတတ်ပါတယ်။
အဲဒီအပြင်ပိုပြင်းထန်တဲ့အဆင့်မှာတော့ ခန္ဓာကိုယ်အတွင်းသွေးယိုစီးမှုတွေရှိလာပြီး ဗိုက်အောင့်တာ၊ ကော်ဖီရောင်အန်တာ၊ သွားဖုံးသွေးယိုတာနဲ့ သတိလစ်တာ စတဲ့ အသက်အန္တရာယ်စိုးရိမ်ရတဲ့ လက္ခဏာတွေ ပေါ်ပေါက်လာနိုင်ပါတယ်။
အာရက္ခကျန်းမာရေးဌာနအနေနဲ့ ရောဂါပိုးသယ်ဆောင်တဲ့ခြင်ကျားတွေ ပေါက်ဖွားမှုကို ဟန့်တားနိုင်ဖို့အတွက် တပတ်ကို တကြိမ်စီခြင်လောက်လန်းနှိမ်နင်းရေး လုပ်ငန်းတွေကို ရပ်ကွက်/ကျေးရွာအလိုက် ဆောင်ရွက်သွားဖို့ တိုက်တွန်းထားပါတယ်။
ဒီနှိမ်နင်းရေးလုပ်ငန်းတွေမှာ ခြင်ကျားပေါက်ဖွားနိုင်တဲ့ အိမ်တွင်း၊အိမ်ပြင်ရှိ ရေလှောင်ကန်တွေ၊အိုးခွက်တွေနဲ့ မသုံးလိုတဲ့ တာယာဟောင်းတွေကို ဖုံး၊ သွန်၊ လဲ စနစ်တကျ လုပ်ဆောင်ဖို့နဲ့ ရေမရှိတဲ့နေရာတွေကို ရှင်းလင်းဖို့ ပါဝင်ပါတယ်။
အဲဒီအပြင်မဖယ်ရှားနိုင်တဲ့ ရေကန်တွေကိုတော့ ပိုးသတ်ဆေး (အဘိတ်) ခတ်ဖို့ လိုအပ်ပါတယ်။
အကောင်းဆုံးကာကွယ်နည်းဟာ ခြင်ကိုက်မခံရအောင် နေထိုင်တာနဲ့ ခြင်ကျားမပေါက်ဖွားအောင် ပြုလုပ်တာဖြစ်လို့ ပြည်သူတွေအနေနဲ့ နှိမ်နင်းရေးအဖွဲ့တွေနဲ့ ပူးပေါင်းဆောင်ရွက်ကြဖို့ နှိုးဆော်ထားပါတယ်။
