Border News Agency
ရေး၊ ဧပြီ ၂၉။
ရေးမြို့အခြေစိုက် အမှတ် ၁၉ စစ်ဆင်ရေးကွပ်ကဲမှုဌာနချုပ်အတွင်းက ပင်မလက်နက်တိုက်ဖောက်ခွဲခဲ့တယ်လို့ တနင်္သာရီတိုင်းစစ်ဌာန ပြန်ကြားရေးက ဧပြီလ ၂၉ ရက်၊ဒီနေ့ထုတ်ပြန်ပါတယ်။
အဲဒီတိုက်ခိုက်မှုကို ရေးပြောက်ကျားတပ်ဖွဲ့ (UG) နဲ့တပ်တွင်းဖရဲသီးတို့ ပူးပေါင်းလုပ်ဆောင်ခဲ့ပြီး လက်နက် ၂၀၀ ခန့် ပျက်စီးခဲ့တယ်လို့ ဆိုပါတယ်။
ဧပြီလ ၁၉ ရက်နေ့က ဖြစ်ပွားတဲ့ ဒီပေါက်ကွဲမှုကြောင့် လက်နက်တိုက်ရှိ ဗုံးသီးတွေနဲ့ ကျည်တွေ ဆက်တိုက်ပေါက်ကွဲကာ ရိက္ခာစတိုးနဲ့ သက်သာဆိုင်တွေပါ မီးလောင်ခဲ့တယ်လို့ဆိုပါတယ်။
အဲဒီဖောက်ခွဲမှုမှာ ကော်မရှင်ဘက်က ၄ ဦး သေဆုံးပြီး ၁၂ ဦး ဒဏ်ရာရခဲ့တယ်လို့ ဆိုပါတယ်။
အဲဒီအပြင် ဧပြီလ ၂၀ ရက်နေ့မှာလည်း အရှေ့တောင်တိုင်းစစ်ဌာနချုပ် တိုင်းမှူး ဗိုလ်ချုပ်ကျော်လင်းမောင် လာရောက်စစ်ဆေးခဲ့တယ်လို့ဆိုပါတယ်။
အဲဒီနောက် ငွေကြေးခိုးယူမှုနဲ့ ပတ်သက်ပြီး ခလရ ၆၁ က ဗိုလ်မှူးတဦးကိုလည်း ဖမ်းဆီးခေါ်ဆောင်သွားခဲ့တယ်လို့ဆိုပါတယ်။
ကျန်ရှိနေတဲ့ ပျက်စီးလက်နက်ခဲယမ်းတွေကိုတော့ ဧပြီလ ၂၁ ရက်နေ့မှာ စစ်ကော်မရှင်တပ်က ခလရ ၆၁ စစ်ပစ်ကွင်းမှာ ပြန်လည်ဖောက်ခွဲ ဖျက်ဆီးခဲ့တယ်လို့ ဆိုပါတယ်။
ဒီစစ်ဆင်ရေးကို အချိန်ယူပြီး စနစ်တကျ ပြင်ဆင်ခဲ့တာလို့ တော်လှန်ရေးအဖွဲ့တွေက ဆိုပါတယ်။
စစ်ကော်မရှင်တပ်က ကျောက်ထုအမြောက်တပ်ဘက်ကို အင်အားဖြည့်တင်းနေသလို ရေးမြို့နယ်မှာလည်း စစ်ရေးတင်းမာနေတယ်လို့ဆိုပါတယ်။
