Border News Agency
နေပြည်တော်၊ မေ ၂။
အမေရိကန်ရဲ့ဒဏ်ခတ်ပိတ်ဆို့မှုတွေကြောင့် အကျပ်ရိုက်နေတဲ့ အာဏာသိမ်းစစ်တပ်ဟာ အမေရိကန်နဲ့ ဆက်ဆံရေးပြန်ကောင်းဖို့အတွက် သမ္မတထရမ့်ရဲ့ လူယုံတော် ရော်ဂျာစတုန်းကို လော်ဘီအဖြစ် ငှားရမ်းလိုက်တယ်လို့ Bloomberg သတင်းမှာ ဖော်ပြထားပါတယ်။
အာဏာသိမ်းစစ်တပ်ဟာ နိုင်ငံတကာငွေပေးချေမှု အခက်အခဲတွေနဲ့ လက်နက်ဝယ်ယူခွင့် ပိတ်ပင်ထားတာတွေကို ဖြေရှင်းဖို့ အရင်ကလည်းလော်ဘီအဖွဲ့တွေကို ဒေါ်လာသန်းချီပေးပြီး ငှားခဲ့ဖူးပါတယ်။
ဒါပေမယ့် အဲဒီအဖွဲ့တွေက သူတို့မျှော်လင့်သလိုရလဒ်တွေ ထွက်ပေါ်အောင် မစွမ်းဆောင်နိုင်ခဲ့ပါဘူး။
အခုအသစ်ငှားလိုက်တဲ့ ရော်ဂျာစတုန်းဟာ ထရမ့်နဲ့ နှစ်ပေါင်းများစွာ ရင်းနှီးသူဖြစ်ပြီး လွှတ်တော်ကို လိမ်လည်ထွက်ဆိုမှုနဲ့ ထောင်ဒဏ်ကျခံခဲ့ရဖူးသူပါ။
သူဟာ ၂၀၂၀ ခုနှစ်မှာ ထရမ့်ရဲ့ လွတ်ငြိမ်းချမ်းသာခွင့်နဲ့ ပြန်လွတ်လာခဲ့တဲ့ နိုင်ငံရေးပွဲစားတဦးလည်း ဖြစ်ပါတယ်။
ဒီတခေါက် ငှားရမ်းမှုကိုတော့ စစ်တပ်လက်အောက်ခံ ပြန်ကြားရေးဝန်ကြီးဌာနက လက်မှတ်ထိုးခဲ့တာဖြစ်ပြီး ငှားရမ်းခ ဘယ်လောက်ပေးရတယ်ဆိုတာကိုတော့ ထုတ်ဖော်ပြောဆိုတာမရှိသေးပါဘူး။
အာဏာသိမ်းစစ်တပ်ကတော့ သူတို့ကျူးလွန်ထားတဲ့ ရာဇဝတ်မှုတွေကို နိုင်ငံတကာက မေ့လျော့သွားအောင် သြဇာရှိသူတွေကိုသုံးပြီး လှည့်ဖျားဖို့ ကြိုးစားနေတာပါ။
ဒါပေမယ့် အမေရိကန်အစိုးရက ချမှတ်ထားတဲ့ ပြင်းထန်တဲ့ ဒဏ်ခတ်ပိတ်ဆို့မှုတွေကို ပြန်ရုပ်သိမ်းဖို့ဆိုတာ သူတို့မျှော်လင့်သလို လွယ်ကူမှာမဟုတ်ဘူးလို့နိုင်ငံရေးလေ့လာသူတွေကသုံးသပ်ထားကြပါတယ်။
