Border News Agency
ထိုင်း၊ မေ ၂။
အာဏာသိမ်းစစ်တပ်အတွက် လက်နက်ပွဲစားလုပ်ပေးနေတဲ့ Sky Aviator ကွန်ရက်က ထိုင်းအများပိုင်ကုမ္ပဏီတခုမှာ ရှယ်ယာတွေဝယ်ပြီး ငွေခဝါချဖို့ ကြိုးပမ်းနေတာကို ထိုင်းအာဏာပိုင်တွေအနေနဲ့ ချက်ချင်းတားမြစ်ဖို့ Justice For Myanmar (JFM) က တောင်းဆိုလိုက်ပါတယ်။
ထိုင်းစတော့အိတ်ချိန်းစာရင်းဝင် ACC ကုမ္ပဏီဟာ လက်နက်ပွဲစား ကျော်မင်းဦးပိုင်တဲ့ ကုမ္ပဏီတွေထံ ရှယ်ယာအမြောက်အမြား ရောင်းချဖို့ ပြီးခဲ့တဲ့ရက်ပိုင်းက အတည်ပြုခဲ့ပါတယ်။
ဒါဟာ ငွေကြေးခဝါချမှုဆိုင်ရာ စိုးရိမ်ချက်တွေရှိနေတဲ့ကြားက လုပ်ဆောင်ခဲ့တာဖြစ်တယ်လို့ JFM က ထောက်ပြထားပါတယ်။
Sky Aviator ကွန်ရက်ဟာ အာဏာသိမ်းစစ်တပ်က ပြည်သူတွေကို လေကြောင်းကနေ ဗုံးကြဲတိုက်ခိုက်ရာမှာသုံးတဲ့ ရုရှားလေယာဉ်အစိတ်အပိုင်းတွေကို အဓိကတင်သွင်းပေးနေတာပါ။
ဒီကွန်ရက်ဟာ အမည်ခံကုမ္ပဏီတွေသုံးပြီး သူတို့ရဲ့ သွေးစွန်းငွေတွေကို ထိုင်းမှာ ခဝါချဖို့ ကြိုးစားနေတာ ဖြစ်ပါတယ်။
”စစ်အုပ်စုရဲ့ ရာဇဝတ်မှုတွေကို ကူညီပြီး ရလာတဲ့ငွေတွေကို ထိုင်းနိုင်ငံကတဆင့် ခဝါချခွင့်မပေးသင့်ဘူး။”လို့JFM ပြောရေးဆိုခွင့်ရှိသူ မရတနာမောင်ကပြောပါတယ်။
အခုဆိုရင် ဒီအရောင်းအဝယ်ကို ရပ်တန့်ဖို့ ထိုင်းအာဏာပိုင်တွေမှာ တာဝန်ရှိလာပြီလို့လည်း ဆိုပါတယ်။
ဒါ့အပြင် နိုင်ငံတကာအနေနဲ့လည်း ဒီလက်နက်ပွဲစားကွန်ရက်မှာ ပါဝင်သူအားလုံးကို ထိရောက်တဲ့ ဒဏ်ခတ်ပိတ်ဆို့မှုတွေ တပြေးညီလုပ်ဆောင်ပေးဖို့ JFM က တိုက်တွန်းထားပါတယ်။
