Border News Agency
အမေရိကန်၊ မေ ၂။
အမေရိကန်-အစ္စရေးနဲ့ အီရန်တို့ကြား စစ်ပွဲဖြစ်ပွားနေတာကြောင့်ကမ္ဘာ့အရေးပါဆုံး ရေလမ်းကြောင်းတခုဖြစ်တဲ့ ဟော်မုဇ်ရေလက်ကြားအတွင်း သင်္ဘောသွားလာမှုဟာ ၉၀ ရာခိုင်နှုန်းကျော်အထိ ထိုးဆင်းသွားတယ်လို့ ဗြိတိန်ရေတပ်က ထုတ်ပြန်ပါတယ်။
အဲဒီရေလက်ကြားဟာ ကမ္ဘာ့ရေနံနဲ့ သဘာဝဓာတ်ငွေ့ စုစုပေါင်းရဲ့ ၂၀ ရာခိုင်နှုန်းလောက် ဖြတ်သန်းရာ အဓိကလမ်းကြောင်းဖြစ်ပြီး အခုလို သွားလာမှု ရပ်ဆိုင်းလုနီးပါး ဖြစ်သွားတာဟာ ကမ္ဘာ့စွမ်းအင်ဈေးကွက်အပေါ် ကြီးမားတဲ့ ရိုက်ခတ်မှုတွေ ရှိလာနေပါတယ်။
အီရန်ဘက်က ဒီရေလမ်းကြောင်းကို အပိုင်စီးပြီး ပိတ်ဆို့ထားသလို အမေရိကန်ဘက်ကလည်း အီရန်ဆိပ်ကမ်းတွေကို ရေတပ်နဲ့ ပိတ်ဆို့ထားတာကြောင့် နှစ်ဖက်စလုံးက ကုန်သွယ်မှုလမ်းကြောင်းတွေကို အပြန်အလှန် ဖြတ်တောက်နေကြတာပါ။
အဲဒီလိုပိတ်ဆို့မှုတွေကြောင့် ကမ္ဘာ့စွမ်းအင်ဈေးနှုန်းတွေ တဟုန်ထိုး မြင့်တက်လာနေပြီး နိုင်ငံတကာ စီးပွားရေးပညာရှင်တွေကတော့ စီးပွားရေးပျက်ကပ် ဆိုက်လာမှာကို စိုးရိမ်နေကြပါတယ်။
ပါကစ္စတန်နိုင်ငံက ဦးဆောင်ပြီး ငြိမ်းချမ်းရေးအတွက် ကြိုးပမ်းနေပေမယ့်လည်း နှစ်ဖက်တင်းမာမှုတွေကြောင့် အခုထိတော့ အဖြေမထွက်သေးပါဘူး။
ဒါ့အပြင် အမေရိကန်သမ္မတ ထရမ့်ကလည်း အီရန်ကို ဖိအားပေးဖို့အတွက် စစ်ရေးအရ ထပ်မံတိုက်ခိုက်ဖို့ ပြင်ဆင်နေတယ်လို့ သတင်းတွေ ထွက်ပေါ်နေတာကြောင့် ဟော်မုဇ်ရေလက်ကြား အခြေအနေဟာ ပိုပြီး စိုးရိမ်စရာ ဖြစ်လာနေပါတယ်။
