Border News Agency
အမေရိကန်၊ မေ ၂။
မေလ ၁ ရက်၊ မနေ့ကကျရောက်တဲ့ ကမ္ဘာ့အလုပ်သမားနေ့မှာ အမေရိကန်ပြည်ထောင်စုတဝိုက်က မြို့ကြီးလေးဆယ်ကျော်မှာအလုပ်သမားအဖွဲ့ပေါင်းငါးရာခန့် စုပေါင်းပြီး အလုပ်သမားအခွင့်အရေးတွေအတွက်ဆန္ဒပြခဲ့ကြပါတယ်။
“ကျောင်းမတက်၊အလုပ်မလုပ်၊ ဈေးမဝယ်”ဆိုတဲ့ ဆောင်ပုဒ်နဲ့အတူ ဘီလျံနာတွေကို ဦးစားပေးတဲ့ မူဝါဒတွေကို ဆန့်ကျင်ပြီး အလုပ်သမားထုရဲ့ အခွင့်အရေးတွေကို ပြန်လည်ရရှိဖို့ တောင်းဆိုခဲ့ကြတာပါ။
အဲဒီဆန္ဒပြပွဲမှာ အဓိကအားဖြင့် ချမ်းသာတဲ့သူတွေကို အခွန်ပိုကောက်ဖို့နဲ့ လူဝင်မှုကြီးကြပ်ရေးနဲ့ နယ်စပ်ဖြတ်ကျော်အရေးယူရေးအဖွဲ့ (ICE) ကို ဖျက်သိမ်းဖို့ တောင်းဆိုခဲ့ကြပါတယ်။
ဒါ့အပြင် လက်ရှိ ထရမ့်အစိုးရလက်ထက်မှာ အလုပ်သမားကာကွယ်ရေး မူဝါဒတွေ လျော့နည်းလာတာ၊ ဖယ်ဒရယ်ဝန်ထမ်းတွေကို အလွယ်တကူ အလုပ်ထုတ်နိုင်အောင် ပြောင်းလဲလိုက်တာတွေအပေါ်မှာလည်း မကျေနပ်မှုတွေ ပြင်းထန်နေပါတယ်။
AI နည်းပညာကြောင့် တလကို ပျမ်းမျှ အလုပ်အကိုင်ပေါင်း တသောင်းခြောက်ထောင်ခန့် ဆုံးရှုံးနေရသလို အလုပ်ခွင် ဘေးကင်းလုံခြုံရေး စံနှုန်းတွေနဲ့ လုပ်ခလစာတိုးမြှင့်ရေး အပိုင်းမှာလည်း အားနည်းချက်တွေ ရှိနေတယ်လို့ အလုပ်သမားအဖွဲ့တွေက ထောက်ပြထားပါတယ်။
အမေရိကန်ရဲ့ဖယ်ဒရယ် အနိမ့်ဆုံးလုပ်ခလစာဟာ ၂၀၀၉ ခုနှစ်ကတည်းက တနာရီကို ၇ ဒသမ ၂၅ ဒေါ်လာမှာပဲ ရပ်တန့်နေတာ ဖြစ်ပါတယ်။
နယူးယောက်မြို့မှာဆိုရင် အလုပ်သမားတွေက Amazon လို ကုမ္ပဏီကြီးတွေအနေနဲ့ ICE နဲ့ ချုပ်ဆိုထားတဲ့ စာချုပ်တွေကို ဖျက်သိမ်းဖို့ တောင်းဆိုခဲ့ကြသလို လမ်းဘေးဈေးသည်တွေနဲ့ သူနာပြုတွေကလည်း သူတို့ရဲ့ ဘဝလုံခြုံရေးအတွက် အသံထွက်ခဲ့ကြပါတယ်။
အဲဒီဆန္ဒပြပွဲတွေဟာ အလုပ်သမားထုရဲ့ စုစည်းမှုကို ပြသလိုက်တာဖြစ်ပြီး အစိုးရရဲ့ဖိနှိပ်မှုတွေကို ကြောက်ရွံ့မနေဘူးဆိုတာကို သက်သေပြလိုက်တာလို့လည်း ဆိုပါတယ်။
မေဒေးနေ့ဟာ ၁၉ ရာစုနှောင်းပိုင်းက အမေရိကန်အလုပ်သမားတွေရဲ့ ၈ နာရီအလုပ်ချိန် တောင်းဆိုရာကစပြီး သမိုင်းဝင်ခဲ့ပေမယ့် အမေရိကန်မှာတော့ စက်တင်ဘာလမှာကျရောက်တဲ့ အလုပ်သမားနေ့ကိုပဲ တရားဝင်ရုံးပိတ်ရက်အဖြစ် သတ်မှတ်ထားတာပါ။
ဒါပေမယ့်လည်း အခုလို မေဒေးနေ့မှာ အလုပ်သမားတွေ စုပေါင်းအင်အားပြတာဟာ လက်ရှိနိုင်ငံရေးနဲ့ စီးပွားရေးအကျပ်အတည်းတွေကြားမှာ ထူးခြားတဲ့ ခြေလှမ်းတခု ဖြစ်နေပါတယ်။
