Border News Agency
ပေါက်တော၊မေ ၃။
အာရက္ခတပ်တော် (AA) ထိန်းချုပ်ထားတဲ့ ပေါက်တောမြို့နယ်မှာ မေလ ၂ ရက်နေ့ကမိုးသက်လေပြင်းတိုက်ခတ်ပြီး မိုးသီးကြီးတွေ ရွာချခဲ့တာကြောင့် ဒေသခံတွေရဲ့ နေအိမ်ခေါင်မိုးတွေ ပေါက်ပြဲပျက်စီးမှုတွေ ရှိခဲ့ပါတယ်။
အဲဒီပေါက်တောမြို့နယ်၊ စိုင်းတုပ်ကျွန်းရှိ ပုဏ္ဏားကြီးကျေးရွာမှာလေပြင်းတိုက်ခတ်ပြီးနောက် ကြက်ဥခန့်ရှိတဲ့မိုးသီးကြီးတွေ မိနစ်အတော်ကြာ ရွာချခဲ့တာ ဖြစ်ပါတယ်။
အခုလို မိုးသီးရွာချမှုကြောင့် ပုဏ္ဏားကြီးကျေးရွာက လူနေအိမ်တွေမှာ အမိုးအကာတွေ ပျက်စီးသွားခဲ့ရသလို ပြီးခဲ့တဲ့ ဧပြီလကုန်ပိုင်းကလည်း ပုဏ္ဏားကျွန်းမြို့နယ်က စစ်ဘေးရှောင်စခန်းမှာ လေပြင်းကြောင့် နေအိမ်တချို့ ပျက်စီးခဲ့ပါသေးတယ်။
အာရက္ခဒေသတဝှမ်းမှာ မိုးထစ်ချုန်းရွာတာ၊ လေပြင်းတိုက်တာနဲ့ မိုးသီးကြွေတာတွေအပြင် မိုးကြိုးပစ်တာတွေပါ ဖြစ်ပေါ်နိုင်တာကြောင့် ပြည်သူတွေအနေနဲ့ ကြိုတင်သတိပြုကြဖို့ မိုးလေဝသဌာနကထုတ်ပြန်ထားပါတယ်။
ဒါကြောင့် အာရက္ခဒေသအတွင်း နေထိုင်ကြတဲ့ ပြည်သူတွေအနေနဲ့ မိုးသက်လေပြင်းအန္တရာယ်ကို ဂရုစိုက်ကြဖို့နဲ့ မိုးလေဝသသတင်းတွေကို အမြဲမပြတ် နားစွင့်ထားကြဖို့ကိုလည်း တိုက်တွန်းထားပါတယ်။
