Border News Agency
နယူးဒေလီ၊ မေ ၃။
အိန္ဒိယနိုင်ငံ၊ နယူးဒေလီမြို့ အရှေ့ပိုင်းက ဝိဝက်ဝီဟာအရပ်မှာရှိတဲ့ လေးထပ်တိုက် လူနေအဆောက်အအုံတခုမေလ ၃ ရက်၊ဒီနေ့မနက်အစောပိုင်းက မီးလောင်မှုဖြစ်ပွားခဲ့ရာမှာ အနည်းဆုံး လူ ၉ ဦး သေဆုံးသွားတယ်လို့ သိရပါတယ်။
အဲဒီမီးဟာ မနက် ၄ နာရီဝန်းကျင်လောက်မှာ စတင်လောင်ကျွမ်းခဲ့တာဖြစ်သလို လေအေးပေးစက် (AC) ပေါက်ကွဲမှု ဒါမှမဟုတ် လျှပ်စစ်ဝိုင်ယာရှော့ဖြစ်ရာကနေ စတင်ခဲ့တာလို့ ယူဆရပြီး သေဆုံးသူတွေထဲမှာ ၁ နှစ်ခွဲအရွယ် ကလေးငယ်တဦးလည်း ပါဝင်နေတာပါ။
မီးသတ်ကား ၁၄ စီးကျော်နဲ့ မီးသတ်သမားတွေ လာရောက်ငြှိမ်းသတ်ခဲ့ရပြီး အဆောက်အအုံအတွင်း ပိတ်မိနေသူ ၂၀ ခန့်ကို ကယ်ထုတ်နိုင်ခဲ့ပေမယ့် မိသားစုဝင်အများအပြားကတော့ မီးခိုးမွှန်တာနဲ့ မီးလောင်ဒဏ်ရာတွေကြောင့် သေဆုံးခဲ့ကြရပါတယ်။
ဒေလီပြည်နယ် BJP ဥက္ကဋ္ဌ ဗီရန်ဒရာ ဆာ့ချ်ဒီဗာက အခင်းဖြစ်ပွားရာနေရာကို သွားရောက်ကြည့်ရှုခဲ့ပြီး သေဆုံးသူတွေအတွက် ဝမ်းနည်းစကားဆိုခဲ့သလို ဒီဖြစ်စဉ်ကို သေချာစုံစမ်းစစ်ဆေးသွားမယ်လို့လည်း ပြောဆိုထားပါတယ်။
အဲဒီ ထိခိုက်ဒဏ်ရာရသူတွေကို ဆေးရုံမှာ ကုသပေးနေပြီး အခုလို အပူရှိန်ပြင်းထန်နေတဲ့ ရာသီမှာ လျှပ်စစ်ပစ္စည်းတွေကြောင့် မီးလောင်မှုတွေ မကြာခဏ ဖြစ်ပွားနေတာကြောင့် ဒေသခံတွေအနေနဲ့ သတိထားကြဖို့လည်း သတိပေးထားပါတယ်။
