Border News Agency
မြောက်ဦး ၊နိုဝင်ဘာ ၇။
အာရက္ခတပ်တော်(AA)ထိန်းချုပ်နယ်မြေတွေက ရေယာဥ်ပို့ဆောင်ရေးလုပ်ကိုင်နေကြသူတွေဟာ အာဏာသိမ်းစစ်တပ်ရဲ့ရေတပ်စစ်သင်္ဘောတွေကပစ်ခတ်တာတွေကြောင့် ရေယာဥ်ပြေးဆွဲပေးနေကြတာတွေ ရပ်နားထားကြရတယ်လို့ဆိုကြပါတယ်။
အဲဒီရေယာဥ်ပြေးဆွဲနေကြတာတွေကို အာဏာသိမ်းစစ်တပ်ရဲ့ရေတပ်စစ်သ င်္ဘောတွေကပစ်ခတ်တာတွေ၊ဖမ်းဆီးတာတွေပြုလုပ်နေတာမို့ ရေယာဥ်လုပ်ကိုင်သူတွေ ရပ်တည်ရေးခက်ခဲနေကြတာပါ။
အဲဒီအထဲမှာ မြေပုံမြို့နယ်နဲ့ဆင်တက်မော်ကျေးရွာကြားပြေးဆွဲနေကြတဲ့ရေယာဥ်တွေကို အာဏာသိမ်းစစ်ရေယာဥ်တွေက ပစ်ခတ်တာတွေလုပ်နေတာမို့
ရပ်နားထားရတာတလကျော်ကြာနေပြီလို့ ရေယာဥ်လိုင်းပြေးဆွဲနေကြသူတွေက ဆိုကြပါတယ်။
“ကျနော်တို့ကအခုလိုင်းမထွက်ရဘဲ တလကျော်လောက်ရှိနေပြီ။စစ်တွေမြစ်မှာ နေဗီရှိတာကြောင့်ပစ်မှာကြောက်လို့ ရပ်ထားရပါတယ်။ရှိတဲ့ပိုက်ဆံကို လိုင်စင်ခအကြေပေးလိုက်ရပြီးမှ လိုင်းဆွဲလို့မရတော့လို့ မိသားစု ရှစ်ယောက် စားဖို့သောက်ဖို့ အခက်အခဲ ဖြစ်နေရပါတယ်။”လို့ မြေပုံ – ဆင်တင်မော် လိုင်းစက်လှေမောင်းသူနေတဲ့ ဦးနုရ်ရုမ်က Border News Agency ကိုပြောပါတယ်။
အဲဒီရေယာဥ်တွေကို ကုလားတန်မြစ်ဝရှိ ရေတပ်စစ်သင်္ဘောတွေကို ပစ်ခတ်တာတွေ၊ဖမ်းဆီးတာတွေ လုပ်နေတာမို့ရေယာဉ်ပြေးဆွဲတာတွေရပ်နားထားကြရပြီး မိသားစုစားဝတ်နေရေးခက်ခဲနေကြတယ်လို့ ရေယာဉ်လုပ်သားတွေကဆိုကြပါတယ်။
အဲဒီရေယာဥ်တွေပြေးဆွဲဆိုအတွက် အာရက္ခပြည်သူ့တော်လှန်ရေးအစိုးရကို တနှစ်စာအပြည့်အခွန်ဆောင်ထားကြရပြီး ရေယာဥ်ပြေးဆွဲတာတွေရပ်နားထားကြရတာမို့ အခွန်ပေးဆောင်ထားတဲ့ငွေတွေအတွက် အလုပ်ကပြန်မရကြဘူးလို့ ရေယာဥ်လုပ်သားတွေက ဆိုကြပါတယ်။
“ဒီရေလမ်းကြောင်းတွေ ရှင်းမလားဆိုပြီးပဲ ကြည့်နေရတယ်။တခြားအလုပ်ကို ပြောင်းလုပ်ဖို့ သို့မဟုတ် ပိုက်တလက် ဝယ်ဖို့အတွက်လည်း ပိုက်ဆံမရှိတော့လို့ အခက်အခဲတွေ ခံနေရတာပါ။”လို့ ဦးနုရ်ရုမ်က ပြောပါတယ်။
အဲဒီရေယာဥ်လုပ်သားတွေဟာ တခြားအသက်မွေးဝမ်းကျောင်းအလုပ်တွေပြောင်းလုပ်ကြဖို့အတွက်လည်း အရင်း အနှီးလုံးဝမရှိကြတော့ဘဲ ရေယာဥ်လမ်းကြောင်းတွေပြန်ဖွင့်လာမယ့်ရက်ကို မျှော်လင့်စောင့်နေကြတယ်လို့ ဆိုကြပါတယ်။
အာရက္ခတပ်တော်ထိန်းချုပ်နယ်မြေတွေက ရေပြင်ကို အားကိုးလုပ်ကိုင်နေကြသူတွေကို အာဏာသိမ်းစစ်တပ်ရဲ့ရေတပ်စစ်သင်္ဘောတွေဟာ ပစ်မှတ်ထားပစ်ခတ်နေတာမို့ ရပ်တည်ရေးပိုခက်ခဲနေကြတယ်လို့ ဆိုကြပါတယ်။
အဲဒီလိုပိတ်ဆို့ထားတာတွေကြာရှည်လာရင် ဒေသခံပြည်သူတွေစားဝတ်နေရေးပိုမိုခက်ခဲလာကြပြီး အငတ်ဘေးကြုံရနိုင်တယ်လို့ ဆိုကြပါတယ်။
